Greqia pritet të mbyllë edhe pikën kufitare të Kakavijës. Lajmi jepet nga autoritetet greke sipas të cilave, shkak për këtë është greva 24 orëshe e punonjësve të doganës greke.
Pika kufitare do qëndrojë e mbyllur nga mëngjesi i së nesërmes në orën 07:00 deri në të njëjtën orë të datës 25 nëntor.
Në këtë pikë do mund të kalojnë vetëm këmbësorët si dhe kampionët që transportojnë mallra ushqimore në kushte frigoriferike, ata që transportojnë kafshë të gjalla ose mjetet që kalojnë për raste emergjente ose raste vdekjesh.
Njoftimi
Autoritetet e Policisë greke, në bazë të një njoftimi zyrtar që i kanë dërguar Policisë Kufitare Kakavije, sqarojnë se për shkak të grevës që do të zhvillohet nga punonjësit e doganës greke, do të ketë një ndërprerje të punës, duke filluar nga dita e nesërme, datë 24 nëntor, ora lokale greke 07:00 deri në orën 07:00 të datës 25 nëntor.
Sqarojmë se gjatë këtij harku kohor, si në hyrje dhe në dalje të doganës greke, nuk do të lejohet kalimi i automjeteve si motoçikleta, autovetura, furgonë që transportojnë qytetarë dhe kamionët që transportojnë mallra.
Përjashtim do të ketë vetëm për udhëtarët këmbësorë, kamionët që transportojnë mallra ushqimore që ruhen në kushte frigoriferike, kamionët që transportojnë kafshët e gjalla dhe automjetet për raste emergjente shëndetësore apo raste vdekjesh.
Policia Kufitare e Kakavije iu bën thirrje të gjithë qytetarëve që duan të udhëtojnë drejt Greqisë, që gjatë këtij harku kohor, të shmangin udhëtimin në drejtim të kësaj pike kalimi. Duke ju falënderuar për bashkëpunimin.
