Një fragment kafke që thuhet se është pjesë e eshtrave të liderit nazist Adolf Hitler është vendosur në një muze në Moskë, si pjesë e një ekspozite historike. RT shkruan se ekspozita është pjesë e festimeve të njëqindvjetorit të Arkivit Shtetëror të Rusisë.
Pjesa e kafkës do të shfaqet në muze deri më 31 janar. Ndër sendet e tjera që tregohen për publikun janë dhe plumbat dhe bajonetat që bolshevikët përdorën për të ekzekutuar monarkun e fundit të vendit Nicholas II dhe familjen e tij në vitin 1918.
Uebfaqja e re Life.ru citoi zyrtarët e arkivit të thoshin se fragmenti i kafkës është pjesë e “mbetjeve të supozuara të Hitlerit”. Ekspozita gjithashtu përmban dokumente të klasifikuara sovjetike nga hetimi për vdekjen e liderit nazist.
Hitleri besohet se bëri vetëvrasje më 30 prill të vitit 1945 vetëm disa ditë para se trupat sovjetike të kapnin Berlinin, duke i dhënë fund Luftës së Dytë Botërore në Evropë. Trupi i tij ishte zhytur në benzinë dhe ishte djegur.
Mbetjet e Hitlerit u varrosën në Magdeburg në Gjermani në vitin 1946, por qeveria Sovjetike pretendon se i zhvarrosi fshehurazi dhe e shkatërroi varrin, nga shqetësimi se vendi i varrimit mund të kthehej në një vend të shenjtë për pasuesit e tij.
Moska vendosi të mbajë fragmentet e kafkës dhe nofullave që ishin përdorur për të identifikuar udhëheqësin nazist.
Përgjatë viteve, shumë spekulime kanë qarkulluar në lidhje me historinë e vetëvrasjes së Hitlerit, ndërsa ka patur dhe teori konspirative se ai ishte gjallë pas disfatës së Luftës së II Botërore, por ishte arratisur në Amerikën e Jugut.
Në vitin 2009, studiuesit amerikanë pretenduan se fragmenti i kafkës i shfaqur në kryeqytetin rus nuk i përkiste në të vërtetë Hitlerit. Kreu i arkivave të Shërbimit Federal të Sigurisë së Rusisë (pasardhësi i KGB-së), Vasily Hristoforov, megjithatë, tha në atë kohë se hetimi mjeko-ligjor sovjetik kishte vërtetuar qartë se eshtrat që tani mbahen në Moskë janë të liderit nazist.
