Të dhënat mjekësore të zyrtarëve izraelitë janë mes të dhënave që raportohet se kanë rrjedhur në internet, pasi një firmë sigurimesh u hakua, por kundërshtoi një pagesë prej 1 milion dollarësh dëmshpërblim në Bitcoin, të kërkuar nga hakuesit kibernetikë.
Kompania e sigurimit Shirbit, që u hakua të martën, refuzoi kërkesat nga grupi Black Shadow, i cili kërcënoi të shiste të dhënat e firmës në internet nëse nuk merrte një pagesë prej 50 bitcoin (950,000 dollarë) brenda 24 orësh.
Të dhënat e hakuara të sapopublikuara thuhet se përfshinin të dhënat mjekësore të klientëve të Shirbit, duke përfshirë zyrtarë izraelitë, si dhe skanime të kartave të identitetit dhe patentave të shoferëve.
Një mesazh në Telegram nga Black Shadow të premten tha që Shirbit kishte refuzuar të paguante shpërblimin.
Kompania gjithashtu konfirmoi kundërshtimin e kërkesës, duke thënë se ajo ‘nuk do të dorëzohej’ ndaj kërcënimeve.
Sipas mediave izraelite, Black Shadow paralajmëroi se kishte ende dhjetëra terrabajt informacion që do e publikonte dhe gjithashtu lëshoi pamje që pretendonin të tregonin se kishte qenë duke negociuar me një anëtar të stafit në Shirbit.
