Tedi Blushi, zëdhënësi i Presidentit Ilir Meta, ka reaguar ndaj deklaratës së Kryeministrit Edi Rama mbi çështjen e detit.
Blushi thotë se sovraniteti i vendit nuk duhet të trajtohet si koncesion për tenderin e radhës.
Më tej zëdhënësi i Presidentit thekson se Kreu i Shtetit nuk do tolerojë asnjë shkelje të Kushtetutës që cenon interesat kombëtare.
“Askush nuk duhet të ketë iluzionin se mund t’ju shmanget detyrimeve kushtetuese dhe zbatimit të ligjit në Shqipëri.
Sovraniteti dhe të drejtat sovrane të Shqipërisë janë të shenjta dhe askush nuk mund të guxojë t’i trajtojë si koncesionin apo tenderin e radhës.
Çdo institucion kushtetues i Shqipërisë, institucion shkencor apo shoqëria civile, duhet të jenë të angazhuara për mbrojtjen e interesave kombëtare, të patjetërsueshme.
Presidenti i Republikës, Sh.T.Z Ilir Meta nuk do të tolerojë, as më të voglën shkelje të Kushtetutës, ligjit apo një papërgjegjshmëri shtetërore të çdo niveli, të qëllimshme ose jo dhe që cenon interesat kombëtare”-shkruan Blushi.
