WhatsApp tha se do të shtyjë një përditësim të planifikuar të politikave të privatësisë për t’u dhënë kohë përdoruesve për të rishikuar kushtet e saj mes frikës se platforma në pronësi të Facebook do të ndajë të dhëna private me kompaninë e saj mëmë, duke ndihmuar në nxitjen e një emigrimi masiv nga aplikacioni.
Aplikacioni i bisedës njoftoi të premten se do të vonojë përditësimin deri në mes të majit, duke fajësuar ‘rrëmujën’ dhe ‘dezinformimin’ për rritjen e shqetësimeve të privatësisë midis klientëve, ndërsa këmbëngul se nuk do të dorëzojë të dhëna shtesë të përdoruesit, të tilla si mesazhe private, te Facebook, nën politikat e saj të reja.
“Ne gjithmonë do t’i mbrojmë bisedat tuaja personale me enkriptim nga fillimi në fund, në mënyrë që as WhatsApp dhe as Facebook të mos mund t’i shohin këto mesazhe private.” – tha kompania.
“Kjo është arsyeja pse ne nuk mbajmë regjistra se kush i çon mesazhet. Ne gjithashtu nuk mund ta shohim vendndodhjen tuaj të përbashkët dhe nuk ndajmë kontaktet tuaja me Facebook.” – vijoi deklarata e kompanisë.
Në fillim të këtij muaji, platforma e bisedës informoi përdoruesit për përditësimin e politikave të privatësisë, duke theksuar se do të përfshinte mundësi të reja për bizneset e mesazheve në WhatsApp, por gjithashtu duke deklaruar se klientët do të kishin kohë deri më 8 shkurt për të pranuar ndryshimet ose përndryshe do të pësonin mbylljen e llogarive.
