Pas dëbimit të diplomatit rus nga Ministria e Jashtme shqiptare, Ambasada Ruse në Tiranë ka ashpërsuar retorikën ndaj politikës shqiptare.
Këtë herë në reagimin e saj Ambasada shigjeton Ramush Haradinaj për deklaratën e tij që do kërkojë referendum për bashkimin me Shqipërinë.
Ambasada e quan Kosovën “pseudo-shtet” ndërsa qëndrimin e Haradinajt si provokim që implikon ideologjinë e “Shqipërisë së Madhe”
Sipas Ambasadës kjo ideologji ka përparuar gjithnjë e më shumë në rajon dhe kërcënon integritetin e shteteve të Ballkanit.
“Nga komenti i Ministrisë së Punëve të Jashtme të Federatës Ruse për deklaratën e z. R.Haradinaj
Kohët e fundit një nga politikanët shqiptarë e Kosovës, Ramush Haradinaj, deklaroi se synon të kërkojë mbajtjen e një referendumi për bashkimin e Kosovës me Shqipërinë, nëse ky pseudo-shtet i vetëshpallur nuk pranohet sa më shpejt në Bashkimin Evropian dhe organizatat ndërkombëtare si dhe Beogradi nuk do të njohë “pavarësinë” e Kosovës.
Këtu po bëhet fjalë për një provokim të radhës, të implikuar në ideologjinë e Shqipërisë së Madhe, e cila kohët e fundit ka përparuar gjithnjë e më intensivisht në rajon dhe kërcënon drejtpërdrejt integritetin territorial të shteteve të Ballkanit. Shantazhi politik është i papranueshëm dhe pikërisht kështu duhet të interpretohet fjalimi i R. Haradinajit, i cili me lehtësi propozon të rishikojë në mënyrë arbitrare kufijtë në Ballkan”-thuhet në deklaratë.