Kryetari i Bashkisë së Tiranës ka reaguar zyrtarisht përmes Drejtorisë së Informacionit në institucionin që drejton mbi përmendjen e emrit të tij në përgjimet e anti-mafias italiane mes pjesëtarëve të Ndraghetës.
Në reagimin e tij Veliaj nuk lë pa përmendur as opozitën ku thotë se “dëshirat e mafiozëve dhe PD-së janë bashkuar në gojën e një trafikanteje të njohur apartamentesh”.
Veliaj i ka bërë thirrje prokurorisë të hetojë këdo që tenton të përmendë Bashkinë e Tiranës.
Për eksponenten e PD-së Grida Duma, kryebashkiaku thotë se do përballet në gjykatë për shpifje.
“Po ndjek përmes shtypit, se si dëshirat e disa mafiozëve italianë për të bërë plane biznesi për Shqipërinë dhe dëshirat e PD-së që këto plane të jenë të vërteta, na janë bashkuar në gojën e një trafikanteje të njohur apartamentesh.
Kushdo që ndërton në Bashkinë e Tiranës ka një emër dhe mbiemër, kurse lejet e ndërtimit kanë dosje transparente për mënyrën e financimit. Dëshirat e mafias italiane për t’u futur në industrinë e ndërtimit janë dëshira të tyre dhe të PD-së. Ne nuk ndalojmë dëshira, por veprime konkrete!
E vërteta është se asnjë leje e Bashkisë së Tiranës nuk është e ndikuar nga grupe interesash, të lidhura me biznese të paverfikueshme. E vetmja gjë e paverifikuar për ne, mbetet se si Grida Duma u bë investitore pallatesh vite më parë, duke përfunduar në gjyqe për mashtrime dhe duke lënë burgjeve partnerët e saj në biznes.
I bëj thirrje Prokurorisë që të hetojë cilindo që tenton të flasë në emër të Bashkisë së Tiranës apo të çdo institucioni tjetër lidhur me histori të tilla.
Ndërkohë, Grida Duma do të duhet ta provojë në gjykatë shpifjen e saj të radhës, njësoj si 7 herët e tjera kur zyrtarët e PD-së janë gjykuar e shpallur si shpifës nga drejtësia!”-thuhet në deklaratë.
