Presidenti Sergio Mattarella tha se ai dëshironte të formonte një qeveri jo-politike për të udhëhequr Italinë gjatë pandemisë së koronavirusit. Kjo ka bërë që kërkesa për të formuar qeverinë e re, t’i bëhet shefit të Bankës Qendrore Europian, Mario Draghi.
Mattarella u bëri thirrje të gjitha partive politike në parlament për të mbështetur formimin e asaj që ai e quajti një qeveri jo-politike.
Me nofkën “Super Mario”, 73-vjeçari Draghi vlerësohet për rolin e tij vendimtar në ruajtjen e monedhës së përbashkët të Evropës, euros, kur ishte president i Bankës Qendrore Evropiane.
Cecilia Sottilotta e cila është një Asistente Profesore e Marrëdhënieve Ndërkombëtare dhe Politikës Globale në Universitetin Amerikan të Romës, tha për Euronews se fjalimi i Mattarella mbrëmë ishte shumë dramatik dhe se “Draghi mishëron me të vërtetë çdo cilësi që asnjë politikan aktualisht nuk ka në Itali – ai është kompetent, është i besueshëm, ka një reputacion të shkëlqyeshëm në Itali dhe jashtë saj, ai është një zgjidhës i pabesueshëm i problemeve – sidoqoftë problemi është në të vërtetë që ai nuk është i zgjedhur, ai është paraqitur si teknokrat dhe kjo mendoj se flet shumë”.
Për ata që duan të dinë më shumë për kryeministrin e ri që pritet të drejtojë Italinë në këtë periudhë të vështirë, mund të vazhdojnë leximin më poshtë.
Kush është Mario Draghi
Mario Draghi, 73 vjeç, është një economist dhe bankier italian që ka mbajtur pozicione të rëndësishme në nivel kombëtar dhe ndërkombëtar, nga Banka e Italisë e deri te Banka Qendrore Evropiane.
Draghi ka lindur në Romë më 3 Shtator të vitit 1947. Babai i tij Carlo Draghi ishte një bankier në Bankën e Italisë (IRI) dhe nëna e tij Gilda Mancini (një farmaciste nga Campania). Mario ishte fëmija i parë i familjes dhe më vonë u bë me një motër, Andreina dhe me një vëlla Marcello.
Fëmijëria e vështirë dhe studimet
Jeta nuk ka qenë aspak e lehtë për këta tre fëmijë, pasi prindërit e tyre u zhdukën në vitin 1962, kur Mario ishte vetëm 15 vjeç. Në moshë fare të re, të treve iu desh të kujdesen edhe për një motër të babait të tyre.
Fati i vështirë e vë Mario Draghi-n në pozicionin e të qenit kryefamiljar në moshën 15 vjeçare. Situata familjare megjithatë nuk i ndaloi ata të ndiqnin studimet.
Andreina studioi në Liceo Tasso në Romë (për Teori Arti në vitin 1999).
Marcello studioi në Institutin Massimo të kryeqytetit (duke u bërë një sipërmarrës). Atje ai u njoh me Luca Cordero di Montezemolo dhe Giancarlo Magalli.
Mario Draghi studioi në të njëjtën Institut në Romë, i cili pasi u diplomua mori rrugën për në Universitetin në La Sapienza në vitin 1970, në Fakultetin e Ekonomisë.
Duke pasur si kryetar ekonomistin italian Federico Caffè, ai diskutoi tezën me titull: “Integrimi ekonomik dhe ndryshimi i kurseve të këmbimit.” Teza i dha atij notat dhe nderimet më të larta. Paradoksi, është se teza e diplomës së tij është shumë kritike për monedhën e vetme evropiane (ende një projekt në atë kohë).
Një vit pas diplomimit, 1971, me rekomandimin e Franco Modigliani, një ekonomisti italian, ai hyri në një nga universitetet më të mira dhe të rëndësishme në botë MIT (Massachusetts Institute of Technology) në Shtetet e Bashkuara.
Draghi në Bankën Qendrore Evropiane
Puna e Mario Draghi, si bankier i Bankës Qendrore Evropiane filloi më 16 maj 2011. Ndërsa më 24 qershor të të njëjtit vit udhëheqësit e Brukselit caktuan përfundimisht Mario Draghi si Guvernator të Bankës Qendrore Evropiane. Mandati i tij filloi në 1 nëntor 2011.
Si një fjalim hapës në cilësinë zyrtare të Guvernatorit Mario Draghi, menjëherë kërkoi nga vendet e Bashkimit Evropian që të fitojnë besueshmëri të re në tregje dhe të shkojnë drejt një politike ekonomike të re, më homogjene në të gjithë zonën e euros.
Më 31 Dhjetor 2012 ai u emërua “Njeriu i Vitit” nga gazetat angleze “Financial Times” dhe “The Times”, që i japin merita për menaxhimin e borxhit evropian në një kohë kaq të vështirë për BE-në duke pasur parasysh që kriza po prekte fuqishëm tregjet e eurozonës dhe po rrezikonte seriozisht ekonomi të rëndësishme si ajo e Italisë dhe e Spanjës.
Jeta private e Mario Draghi-t
Lajmet për jetën private të Mario Draghi-t dhe vilën në Lavinio tregojnë për një burrë që rri në krye të institucioneve më të rëndësishme të kreditit në botë, por në të njëjtën kohë nuk i pëlqen të jetë në qendër të vëmendjes.
Me një vilë në Lavinio, Mario Draghi shpesh është parë duke vrapuar me veshje sportive. Në fakt, ai është një adhurues i madh i sporteve, si tenisi dhe golfi. I rezervuar dhe gjithmonë jashtë vëmendjes kur bëhet fjalë për jetën e tij private, Mario Draghi duket se është një nga ata njerëz të ndrojtur që nuk i pëlqen të jetë në qendër të vëmendjes.
Mario Draghi, gruaja Serena dhe fëmijët:
Mario Draghi është i martuar me Serena Draghi (Maria Serenella Cappello). Gruaja e tij vjen nga një familje fisnike duke qenë se është pasardhëse e Bianca Cappello, gruas së Dukës së Madh të Toskanës, Francesco de ‘Medici.
Dy fëmijët:
Federica Draghi është e diplomuar për biologji, ndërsa ka dhe kryer dhe studimet master në Nju Jork për biznes. Aktualisht ajo drejton një kompani që merret me bioteknologji.
Giacomo Draghi (i diplomuar në Bocconi dhe aktualisht është një tregtar financiar në Morgan Stanley).
VINI RE: Materialet për këtë artikull janë marrë nga Euronews dhe The Italian Times
