Sunduesit ushtarakë të Mianmarit kanë mbyllur internetin në vend, ndërsa mijëra njerëz protestojnë kundër grushtit të shtetit të kësaj jave.
Observatori i Internetit NetBlocks tha se pati një ndërprerje pothuajse totale të internetit e cila është ende në fuqi, me lidhjen që bie në 16% të niveleve të zakonshme.
Shërbimi i BBC-së në Burma gjithashtu konfirmoi bllokimin e internetit.
Kjo lëvizje vend pas tubimeve të mëdha që po zhvillohen, që kur ushtria mori pushtetin të hënën.
“Diktator ushtarak, dështo, dështo; Demokraci, fito, fito!”– brohoriti turma në qytetin kryesor,Yangon.
Policia ka bllokuar rrugët kryesore në qendër të qytetit. Hyrja në Twitter dhe Instagram është bllokuar gjithashtu për të ndaluar mobilizimin e njerëzve, një ditë pas ndalimit të Facebook-ut.
Të shtunën, protestuesit bënë thirrje për lirimin e personave të ndaluar nga ushtria, duke përfshirë dhe udhëheqësen e zgjedhur Aung San Suu Kyi.
Ata marshuan nëpër rrugët e Yangon-it, ndërsa autobusët e qytetit u binin borive në mbështetje të tyre. Kalimtarët përshëndetën me tre gishta, i cili është bërë një simbol i sfidës kundër autoritarizmit në rajon.
Demonstruesit i dhanë policisë trëndafila dhe shishe me ujë të pijshëm, duke i thirrur ata që të mbështesnin njerëzit, e jo regjimin e ri.
