Përpjekjet e ekipeve të kërkim- shpëtimit janë ende duke u zhvilluar në Indinë veriore pasi shkëputja e një akullnaje shkaktoi një përmbytje të madhe dhe dëmtoi një termocentral në ndërtim.
Të paktën 26 njerëz vdiqën në incident ndërsa gati 200 janë ende të zhdukur.
Më shumë se 2,000 njerëz, përfshirë ekipet e shpëtimit, forcat ushtarake, policinë dhe grupet paraushtarake u vendosën të dielën në një rajon të largët malor në shtetin Uttarakhand pasi një shpërthim akullnaje shkaktoi një përmbytje vdekjeprurëse.
Ekipet e shpëtimit arritën të shpëtonin 16 persona pas përmbytjes që mbuloi luginën e lumit Dhauliganga me një shtresë të trashë baltë dhe mbeturinash.
Sidoqoftë, numri i të zhdukurve që nga ajo kohë është rritur në 160 dhe 200, sipas vlerësimeve të ndryshme të raportuara nga media lokale.
Shumica e të zhdukurve janë punëtorë të përfshirë në ndërtimin e dy termocentraleve në luginë.
