Finalizohet operacioni “Taksisti” me arrestimin e një 52-vjeçari, i cili dyshohet se shpërndante lëndë narkotike me taksi.
Policia në Lezhë ka vënë në pranga taksistin e quajtur Luftar Hysa, i cili nuk i është bindur urdhrit të efektivëve për të ndaluar. Madje dhe gjatë tentativës për t’u larguar, ka goditur një nga mjetet e shërbimeve të Policisë.
Gjatë kontrollit të ushtruar më pas në automjetin tip “Benz” që shërbente si taksi, u gjetën 10.2 kilogramë kanabis.
Njoftimi i policisë:
Goditet një tjetër rast i veprimtarisë së paligjshme në fushën e narkotikëve.
Sekuestrohen 10.2 kg lëndë narkotike e dyshuar cannabis sativa.
Vihet në pranga drejtuesi i mjetit taksi që po transportonte lëndën narkotike.
Specialistët për Hetimin e Narkotikëve dhe Trafiqeve të Paligjshme në DVP Lezhë, nën drejtimin e Prokurorisë, pas një hetimi disaditor, organizuan dhe finalizuan operacionin policor të koduar “Taksisti”, si rezultat i të cilit u bë e mundur kapja dhe arrestimi në flagrancë i shtetasit:
L.H., 52 vjeç, banues në Mamurras, Kurbin. Shërbimet e Policisë, mbi bazën e informacionëve të disponuara se me një mjet taksi po transportohej lëndë narkotike, kanë organizuar punën dhe në Milot, kanë identifikuar mjetin dhe i kanë bërë shenjë për të ndaluar. Drejtuesi i mjetit, gjatë tentativës për t’u larguar, ka goditur një nga mjetet e shërbimeve të Policisë.
Gjatë kontrollit të ushtruar nga Policia, në automjetin tip “Benz” që shërbente si taksi u gjetën dhe u sekuestruan në cilësinë e provës materiale 10.2 kg lëndë narkotike e dyshuar canabis sativa.
Strukturat hetimore të DVP Lezhë, nën drejtimin e Prokurorisë së Rrethit Gjyqësor Kurbin, po vijojnë veprimet hetimore për identifikimin e personave të tjerë të implikuar në këtë veprimtari të paligjshme.
Materialet hetimore do t’i referohen Prokurorisë së Rrethit Gjyqësor Kurbin, për veprën penale “Prodhimi dhe shitja e narkotikëve”.
