Studiuesit e qeverisë amerikane kanë zbuluar se dy maska janë më të mira se një, në ngadalësimin e përhapjes së koronavirusit.
Por zyrtarët shëndetësorë nuk ua rekomandojnë të gjithëve vendosjen e maskave dyfishe.
Qendrat për Kontrollin dhe Parandalimin e Sëmundjeve të mërkurën, raportuan rezultatet e një eksperimenti laboratorik ku dy koka artificiale u vendosën 1.5 metra metra larg njëra-tjetrës dhe u panë se sa grimca me madhësi të koronavirusit të nxjerra nga njëra, do të thitheshin nga tjetra.
Gjatë këtij eksperimenti, studiuesit zbuluan se veshja e dy maskave (një maskë pëlhure mbi një maskë kirurgjikale) mund të bllokojë deri në 92.5 për qind të grimcave infektive që qarkullojnë në ajër.
Por CDC nuk rekomandoi që amerikanët të fillojnë të vendosin nga dy maska dhe vuri në dukje se ka metoda të tjera, si lidhja e telave të një maske kirurgjikale që mund të përmirësojnë përshtatjen dhe efikasitetin e tyre.
“Këto të dhëna eksperimentale përforcojnë udhëzimet paraprake të CDC-së që të gjithë mbi moshën 2 vjeç duhet të mbajnë maskë kur janë në publik apo pranë njerëzve të tjerë në shtëpi që nuk jetojnë me ta.”– tha Dr Rochelle Walensky, drejtoreshë e CDC-së, citon Daily Mail.
“Ne vazhdojmë të rekomandojmë që maskat të kenë dy ose më shumë shtresa, të mbulojnë plotësisht hundën dhe gojën tuaj dhe të përshtaten mirë me hundën dhe anët e fytyrës tuaj.”
Dhe sekretarja e shtypit e Presidentit Biden, Jen Psaki tha të martën se Shtëpia e Bardhë nuk po e këshillon vendosjen e dy maskave, megjithë zakonin që vetë Biden ka për të mbajtur dy maska. Por po shqyrton ‘një varg opsionesh’ për maskat për amerikanët.
Komentet e saj erdhën pasi shefi i stafit të Shtëpisë së Bardhë Ron Klain tha se administrata e Biden po konsideronte një iniciativë për të dërguar maska në çdo familje amerikane – një plan i parë i sugjeruar nga administrata e Trump.
