Këshilltari i presidentit Meta, Shemsi Prençi është dorëhequr nga pozicioni që mbante. Njoftimin e ka bërë vetë kreu i shtetit nëpërmjet një postimi në Facebook, ku jep edhe arsyet e largimit të tij.
Pak javë më parë, një tjetër këshilltar i Metës, Bahri Shaqiri u largua nga pozicioni që mbante duke qenë se do kandidojë për LSI-në në qarkun e Durrësit, ashtu si edhe Prençi.
“Këshilltari për Çështjet e Emergjencave Civile, z.Shemsi Prençi, pasi më informoi si çdo ditë, për situatën e përmbytjeve në mbarë vendin dhe gjendjen e banorëve në zonat e bllokuara nga dëbora, më njoftoi sot dorëheqjen e tij nga kjo detyrë, për shkak të angazhimeve të tij të reja në të ardhmen.
E falenderova për këshillat e vlefshme, përkushtimin, korrektësinë, profesionalizimin dhe ndjenjat atdhetare të dëshmuara prej tij gjatë bashkëpunimit tonë të frytshëm për gati dy vite.
Duke e pranuar dorëheqjen e z.Prençi, i urova suksese për të ardhmen.” – shkruan Meta në Facebook.
