Turqia do të kthehet gradualisht në jetën normale nga marsi, të paktën kështu tha presidenti Tayyip Erdogan të mërkurën.
Ai shtoi se masat e izolimit nëpër fundjava, me qëllim të luftimit të koronavirusit, do të hiqen varësisht nga shkalla e infektimit.
Turqia vendosi orë policore, bllokimet e fundjavës dhe masa të tjera në dhjetor përballë rasteve në rritje të koronavirusit. Por tani Erdogan planifikon të rihapë shkollat në mbarë vendin në 1 Mars, dhe programi i vaksinimit deri më tani ka administruar doza për gati 5.7 milion njerëz duke përdorur vaksinën e zhvilluar nga kompania Sinovac Biotech Ltd. e Kinës.
Duke folur pas një takimi të kabinetit në Ankara, Erdogan tha se në ditët e ardhshme do të shpallte një plan mbi rihapjen e kafeneve dhe restoranteve, të cilat janë mbyllur prej muajsh dhe u bëri thirrje qytetarëve të vazhdojnë t’i përmbahen masave.
“Ne do t’i kategorizojmë provincat tona në rrezik të ulët, të mesëm, të lartë dhe shumë të lartë bazuar në normat e infeksionit dhe vaksinimit. Që nga marsi, ne po fillojmë periudhën e normalizimit gradual.”– tha ai, citon Reuters.
Turqia deri më tani ka raportuar më shumë se 2.6 milion raste dhe gati 27 mijë vdekje nga COVID-19 që prej fillimit të pandemisë në mars të vitit të kaluar. Megjithëse vaksinimet filluan muajin e kaluar, rastet e reja të përditshme janë shënuar midis 6,000 dhe 8,000 duke shkaktuar shqetësim.
Erdogan tha se ai besonte që Marsi do të ishte një muaj në të cilin Turqia “bën përparime të mëdha në drejtim të vaksinimit” dhe shtoi se Ankara po bënte rregullimet e nevojshme për prokurimin e dozave.
