Lëvizja Vetëvendosje në Kosovë arriti një fitore historike në zgjedhjet e parakohshme parlamentare të 14 shkurtit, e në Shqipëri sapo ka nisur aktivitetin e saj politik.
Këtë muaj, Lëvizja Vetëvendosje në Shqipëri ka prezantuar tre kandidatë për deputetë në tre qarqe: Boiken Abazi në Tiranë, Iliaz Shehu në Lezhë dhe Kreshnik Merxhani në Gjirokastër.
Por VV nuk është regjistruar si një parti politike dhe në zgjedhje do të futet si një mbështetëse e shoqërisë civile.
Arsyeja kryesore lidhet me ndryshimet në kodin zgjedhor të miratuara nga mazhoranca, që sipas kësaj organizate i pengon forcat e reja që të hyjnë në zgjedhje.
Por le të njihemi pak më shumë me kandidatët e Vetëvendosjes në Shqipëri.
Boiken Abazi
Boiken Abazi lindi në Tiranë, në vitin 1982 dhe sot është drejtues ekzekutiv i Qendrës së Lëvizjes VETËVENDOSJE në Shqipëri.
Por ai ka qenë i njohur dhe ka bashkëpunuar me Lëvizjen Vetëvendosje edhe më parë që prej vitit 2006, e madje ka mbajtur dhe disa pozicione brenda organizatës, më e fundit si Sekretar për Marrëdhënie me Jashtë derisa dha dorëheqjen në vitin 2019 për të drejtuar Qendrën në Shqipëri.
Abazi është diplomuar në Universitetin “Eastern Michigan”, në Shtetet e Bashkuara, me një diplomë në Shkenca Politike (Marrëdhënie Ndërkombëtare) dhe Ekonomi (Ekonomi Zhvillimore), si dhe me një degë plotësuese në Gjuhë dhe Letërsi Franceze.
Para angazhimit me Lëvizjen, ai ka punuar në projekte të shoqërisë civile me OJQ në Michigan dhe në qytetin e “Neë York”-ut, më pas u kthye në Shqipëri duke u angazhuar në organizata të ndryshme të shoqërisë civile, si dhe duke dhënë mësim në Universitet.
Bojken Abazi ka qenë një nga njerëzit e afërt të Erjon Veliajt në lëvizjen Mjaft dhe në vitin 2005 drejtoi projektin “Udha e Shkronjave” ku Mjaft me fondet e ndërkombëtarëve ngriti shkolla ambulante për fëmijët e zonave informale të Tiranës.
Por ai u nda me Veliajn kur nisën tronditjet e para brenda Mjaftit, që u kthye në një parti politike në fillim si G99-ta, e më pas u shkri brenda Partisë Socialiste.
Abazi flet rrjedhshëm gjuhën angleze, italiane dhe frënge, ndërsa ka njohuri edhe në gjuhën greke dhe spanjolle.
Iliaz Shehu
Iliaz Shehu është diplomuar në Universitetin Europian të Tiranës, në vitin 2011 për Shkenca Politike. Ndërsa masterin e ka kryer në Francë në universitetin e Sorbonës, ku tashmë ai po përmbyll dhe doktoraturën e tij në Filozofi.
Me Lëvizjen VETËVENDOSJE, njëlloj si Abazi ai është njohur që herët dhe ka nisur të aktivizohet që në vitin 2009. Madje së bashku me disa studentë e pedagogë nga Tirana ka shkuar ta mbështesë në zgjedhjet parlamentare të Kosovës, ku kjo lëvizje garonte për herë të parë si subjekt politik.
Në një spot të publikuar në rrjetet sociale, Shehu shprehet: “Zgjodha t’ju drejtohem pra në këtë mënyrë për t’ju njoftuar se jam kandidat për deputet dhe për t’ju kërkuar që ta mendoni mirë votën që do të jepni kësaj here. Vota është vendimtare. Emrat e kandidatëve janë vendimtarë. Ku nuk ka dije dhe moral, pushteti nuk është më politik por dhunë. Nuk është më prodhues, por grabitës.”.
Kreshnik Merxhani
Kandidati i tretë i Vetëvendosjes është Kreshnik Merxhani. Ai është arkitekt dhe specialist i trashëgimisë kulturore shqiptare.
Merxhani është diplomuar për arkitekturë në Universitetin Politeknik të Tiranës. Ai është i fokusuar përgjithësisht në fushën e trashëgimisë kulturore dhe arkitekturën tradicionale.
Që nga viti 2008, ai është i angazhuar si bashkautor në projektet e restaurimit të disa monumenteve të periudhës Osmane dhe Komuniste kryesisht në Qytetin e Gjirokastrës.
Në 2014-2016 ai ishte Shef i Sektorit Teknik të DRKK (Drejtoria Rajonale e Kulturës Kombëtare) – Gjirokastër, një zyrë terreni në Ministrinë e Kulturës.
Përveç kësaj, disa projekte që ai ishte bashkëautor dhe disa aktivitete të ish-organizatës ku Merxhani ishte pjesë, janë nominuar dhe renditur në listën e shkurtër për çmimin Aga Khan (GCDO) Cikli 2010, dhe janë fitues të Europa Nostra Price (CHWB) .
Merxhani është pjesë e grupit që aplikoi për mbrotjen e Teatrit në “Europa Nostra” dhe ka meritën kryesore për përzgjedhjen e këtij teatri në listën e 7 finalistëve për programin “7-të vendndodhjet më të rrezikuara” i organizatës pan-evropiane Europa Nostra.
Kjo është hera e parë që Lëvizja Vetëvendosje merr pjesë në zgjedhjet në Shqipëri.
Për t’u konsideruar zyrtarisht kandidatë për deputetë, secili prej tyre duhet të mbledhë 3 mijë firma të qytetarëve.
Siç bën me dije Abazi në një njoftim në Facebook, deri më tani në Tiranë janë arritur 2700 nënshkrime ndërsa u duhen edhe 300 të tjera.
Afati i fundit për dorëzimin e nënshkrimeve bashkë me fotokopjen e dokumentit të identifikimit për secilin, ëshjtë data 7 mars./ Hashtag.al
