Një shpërthim i murtajës bubonike në Republikën Demokratike të Kongos ka çuar në dhjetëra viktima. Sëmundja e rrezikshme ka kthyer frikën e rikthimit të asaj që njihet si pandemia e Vdekjes së Zezë në Europë në shekullin e 14-të.
Raste të shumta të murtajës u identifikuan në zonën Biringi të provincës Ituri në verilindje të Kongos midis 15 nëntorit dhe 13 dhjetorit, tha për AFP-në, Anne Laudisoit, shefja e ‘Ecohealth Alliance’ me bazë në SHBA.
Të paktën 520 njerëz janë sëmurë dhe ‘më shumë se 31’ prej tyre kanë vdekur, tha ministri i Shëndetësisë në Ituri, Patrick Karamura.
Shumica dërrmuese e rasteve përfshinte murtajën bubonike, me përjashtim të pesë rasteve të murtajës pneumonike dhe dy rasteve të murtajës septicemike, të cilat ndodhin kur sëmundja përhapet përkatësisht në mushkëri ose gjak.
Të miturit ishin më të prekurit, me moshën mesatare të pacientëve që ishin vetëm 13 vjeç. Midis të infektuarve ishte një foshnjë tre muajshe, sipas Laudisoit.
Murtaja, e cila është shkaktuar nga bakteri Yersinia pestis, është endemike në provincën ku u konfirmua për herë të parë në vitin 1926.
