Policia e Fierit thotë se ka zbardhur dhe dokumentuar me prova vrasjen e Shkëlzen Kastratit, që ka ndodhur më 1 shkurt të këtij viti.
Përmes një njoftimi për mediet, bëhet me dije se janë shpallur në kërkim katër persona të dyshuar për ekzekutimin e Kastratit.
Ata janë shtetasit Albert Zaja, Elmir Tufa, Silvio Cara dhe Elson Xhecuka. Uniformat blu dyshojnë se ata mund të jenë larguar drejt vendeve të BE-së.
Gjatë kontrolleve në banesat e personave të dyshuar, policia ka gjetur dhe sekuestruar në cilësinë e provës materiale dy automjetet që kanë përdorur autorët për t’u larguar nga vendngjarja.
Njoftimi i policisë:
Në vijim të veprimeve hetimore të kryera nga strukturat hetimore të DVP Fier, në koordinimin nga Departamenti i Policisë Kriminale, nën drejtimin e Prokurorisë së Rrethit Gjyqësor Fier, si rezultat i provave të grumbulluara gjatë hetimeve, u bë e mundur zbardhja e ngjarjes dhe identifikimi i autorëve.
Mbi bazën e provave të grumbulluara nga strukturat hetimore të DVP Fier, Gjykata e Rrethit Gjyqësor Fier ka vendosur në mungesë masën “Arrest në burg”, për veprën penale “Vrasja me paramendim” kryer në bashkëpunim, për shtetasit:
- A. Z., 37 vjeç dhe E. T., 29 vjeç, të dy banues Fushë Krujë;
- E. Xh., 27 vjeç, banues në Kamzë, Tiranë;
- S. alias R. C., 39 vjeç, banues në Tiranë.
Gjithashtu, në zbatim të vendimit të Gjykatës, nga ana e Policisë është ushtruar kontroll në banesat e këtyre shtetaseve. Në përfundim të veprimeve është bërë shpallja e tyre në kërkim kombëtar dhe vijon puna edhe për shpalljen në kërkim ndërkombëtar.
Gjatë veprimeve hetimore, strukturat e Policisë kanë sekuestruar në cilësinë e provës materiale edhe dy automjetet që janë përdorur nga autorët për të kryer vrasjen dhe për t’u larguar nga vendi i ngjarjes.
Vijon puna për lokalizimin e tyre dhe po bashkëpunohet me homologët, pasi dyshohet se mund të jenë larguar drejt një vendi të BE-së.
Gjithashtu, nën drejtimin e Prokurorisë vijon puna hetimore nga strukturat e Policisë, për zbardhjen e plotë të kësaj ngjarjeje, identifikimin dhe kapjen e personave të tjerë që mund të jenë të implikuar në këtë ngjarje kriminale./Hashtag.al
