Një seri trazirash të bashkërenduara në disa burgje në Ekuador shkaktuan të paktën 75 viktima, sipas autoriteteve. Sipas autoriteteve të vendit, shkak për dhunën është lufta mes bandave të drogës për pushtet pas vrasjes më të fundit të një bosi krimi.
Trazirat vdekjeprurëse shpërthyen njëkohësisht në tre burgje të mëdha në pjesë të ndryshme të qarkut. Shërbimi i burgut i Ekuadorit, SNAI, fillimisht raportoi një numër të vdekurish prej 62 personash, por më shumë trazira ndodhën më vonë gjatë ditës, dhe numri i vdekjeve të raportuara u rrit në 75.
Sipas drejtorit të shërbimit, Edmundo Moncayo, shpërthimi rrjedh nga një luftë për pushtet midis bandave të fuqishme të drogës në vend. Udhëheqësi i njërit prej tyre, Los Choneros, u vra dhjetorin e kaluar, pak pasi u lirua nga burgu me kusht, duke shkaktuar një përçarje të brendshme dhe duke e bërë të dobët ndaj grupeve rivale.
Agjencia u informua nga policia kombëtare që të burgosurit në një burg në qytetin port të Guayaquil kishin dy armë të trafikuara brenda burgut dhe se armët do të përdoreshin për të vrarë udhëheqësit e Los Choneros. Trazira ndodhën edhe në burgjet në qytetet Cuenca dhe Latacunga. Rreth 70 për qind e të burgosurve në Ekuador mbahen pikërisht në këto tre burgje.
Në Ekuador janë ekzekutuar vitet e fundit edhe disa shtetas shqiptarë të cilët akuzohen si anëtarë të bandave të drogës që veprojnë në vendin amerikano-jugor. Po kështu në njërin prej burgjeve të Ekuadorit vuan dënimin e tij shqiptari Dritan Rexhepi, i cili është në kërkim nga disa vende europiane.
