Bllokimet në shërbimet e kujdesit shëndetësor të shkaktuara nga Covid-19 mund të ketë çuar në rreth 239 mijë vdekje të fëmijëve apo vdekje maternale (të shkaktuara gjatë lindjes apo shtatzënisë) në Azinë Jugore, sipas një raporti të ri të OKB-së.
Siç shkruan BBC, raporti është përqendruar në Afganistan, Nepal, Bangladesh, Indi, Pakistan dhe Sri Lanka, shtëpia e rreth 1.8 miliardë njerëzve.
Raporti zbuloi se gratë, fëmijët dhe adoleshentët ishin më të goditurit.
Azia Jugore ka raportuar gati 13 milion raste të Covid-19 dhe më shumë se 186,000 vdekje deri më tani.
Shumë vende të botës, përfshirë ato në Azinë Jugore, iu përgjigjën pandemisë me bllokime të rrepta. Ndërsa spitalet, farmacitë dhe dyqanet ushqimore mbetën të hapura, pothuajse gjithçka tjetër u mbyll.
Raporti mbi “Efektet Direkte dhe Indirekte të Pandemisë dhe Reagimit të Covid-19 në Azinë Jugore”, shqyrton efektin e këtyre strategjive qeveritare në kujdesin shëndetësor, shërbimet sociale, përfshirë shkollat dhe ekonominë.
Ky raport vlerëson se ka pasur 228,000 vdekje shtesë të fëmijëve nën pesë vjeç në këto gjashtë vende për shkak të shërbimeve thelbësore, të ndaluara.
Po ashtu thuhet se numri i fëmijëve që trajtohen për kequshqyerje të rëndë ra me më shumë se 80% në Bangladesh dhe Nepal, dhe imunizimi midis fëmijëve ra me 35% dhe 65% respektivisht në Indi dhe Pakistan.
Raporti gjithashtu thotë se vdekshmëria e fëmijëve u rrit në nivelin më të lartë në Indi në vitin 2020 me 15.4% – e ndjekur nga Bangladeshi me 13%. Sri Lanka pa rritjen më të madhe të vdekjeve maternale – 21.5% e ndjekur nga Pakistani 21.3%.
Vdekshmëria e fëmijëve në Bangladesh mund të rritet me 13%, thotë raporti.
Gjithashtu vlerësohet se ka pasur rreth 3.5 milion shtatzëni të padëshiruara shtesë, duke përfshirë 400 mijë të tilla midis adoleshentëve, për shkak të aksesit të dobët ose mungesës së kontracepsionit.
Efekti i plotë i pandemisë dhe bllokimet pasuese – sapo kanë filluar të bëhen të qarta ndërsa vendet marrin një vlerësim të programeve të tyre të shëndetit publik dhe arsimit.
Ekspertët në Indi tashmë kanë frikë se normat e kequshqyerjes do të jenë dukshëm më të këqija në të gjithë vendin kur të dhënat të dalin gjatë muajve të ardhshëm.
Disa vende në Azinë Jugore, si India, janë ende duke luftuar me një rritje të infeksioneve. Ndërsa mbyllja në mbarë vendin përfundoi në qershor të vitit të kaluar, disa shtete dhe rrethe kanë përdorur bllokime të përhershme për të ndaluar përhapjen e virusit.
Ndërprerja e shërbimeve shëndetësore gjithashtu preku ata që vuajnë nga sëmundje të tjera – raporti parashikon një tjetër shtesë prej 5,943 vdekjesh në të gjithë rajonin midis adoleshentëve që nuk mund të trajtoheshin nga tuberkulozi, malaria, tifoja dhe HIV / Aids.
