Gjiganti amerikan i teknologjisë, Apple, është gjobitur me 1.9 milion dollarë nga Procon-SP, agjencia braziliane e mbrojtjes së konsumatorit për shtetin e Sao Paulos. Gjoba është argumentuar nga enti brazilian me mungesën e përshtatësve për karikuesit.
Dënimi vjen muaj pasi rregullatori kërkoi nga kompania e teknologjisë amerikane të dërgojë iPhone 12 dhe modele të tjera të reja të telefonit celular të njohur me kabllot e përshtatësit përkatës.
Në tetor, firma me bazë në Cupertino mori vendimin e diskutueshëm për të hequr karikuesin dhe EarPods nga kutitë e reja të iPhone. Sipas kompanisë, hapi është ndërmarrë në mënyrë që të arrijë qëllimet e saj mjedisore, pasi Apple synon të bëhet 100% pa çlirim karboni deri në vitin 2030.
Heqja e përshtatësit të energjisë dhe kufjeve thuhet se do të zvogëlonte paketimin me 70%. Kjo me sa duket do të lejojë Apple të dërgojë më shumë pajisje në të njëjtën kohë, duke ulur kështu çlirimet e karbonit që kanë lidhje me transportin.
Menjëherë pas njoftimit, Procon-SP i Brazilit kërkoi që Apple të provojë se heqja e përshtatësit nga kutia do të zvogëlojë çlirimet e karbonit në atmosferë.
