Gjetjet paraprake të një hetimi të kryer nga Kina dhe Organizata Botërore e Shëndetësisë (OBSH) tregojnë se Covid-19 ka të ngjarë të jetë transmetuar te njerëzit nga kafshët dhe nuk ka dalë nga një laborator, sipas raporteve të mediave.
Bazuar kryesisht në të dhënat e mbledhura gjatë një misioni të OBSH-së për gjetjen e fakteve në Wuhan, raporti shprehet se transmetimi i virusit nga lakuriqët e natës tek njerëzit përmes një kafshe tjetër është skenari më i mundshëm, tha Associated Press, duke cituar një draft kopje. Studimi gjithashtu hodhi poshtë teorinë se virusi mund të ketë origjinën nga një laborator si ‘jashtëzakonisht e pamundur’.
Transmetimi përmes një kafshe të dytë është shumë i mundshëm, pretendon raporti, ndërsa përhapja e drejtpërdrejtë e virusit nga lakuriqët e natës tek njerëzit shihet si skenari i dytë më i mundshëm.
Ekipi që përpiloi studimin bëri thirrje për hetime të mëtejshme mbi atë që shkaktoi pandeminë, por rekomandoi që të hidhej poshtë hipoteza e rrjedhjes nga laboratori.
