Kryeministri Edi Rama duket se e ka bërë pjesë të diskursit të tij politik dhe pjesë të propagandës marrjen e punonjësve të huaj nga kompanitë private shqiptare për të relativizuar papunësinë në Shqipëri.
Këtë radhë, duke bërë fushatë në Shkodër, Rama ka qenë në një fasoneri ku gjatë bisedës pronari i saj i ka thënë se ka punë në kompani por nuk ka punonjës dhe ka porositur të vijnë punonjës nga jashtë.
Rama nga ana tjetër vijoi duke thënë se punonjësit nga Bangaldeshi i ka gati dhe “nuk bëjnë thashetheme”.
Pjesë nga biseda:
Pronari: Unë po plasi tu kërku punëtorë në Tiranë dhe Berat, a doni punë dhe nuk vjen askush. Në televizione të gjithë thonë nuk ka punë, ne kemi aq shumë punë sa nuk kemi ku ta çojmë. Para disa ditësh ne kthyem një përfaqësues të Zaras vetëm për mungesë punëtorësh. Paga nuk është 30 mijë lekë por 40 mijë lekë, sa do ta bëni ju vitin tjetër.
Rama: Katër vjet duam ne ta bëjmë 40 mijë lekë.
Pronari: Nuk ka fuqi punëtore.
Rama: Unë e di që kjo është bisedë e rrezikshme për ne se na hidhen në fyt dhe pastaj kur u tregojmë këto thonë se kjo nuk është punë, është skllavëri, është poshtërsi. Më vjen shumë keq për ata që nuk kuptojnë por nuk kemi çfarë t’u bëjmë. Ne e kemi kaluar ligjin e ri për të huajt që është shumë i thjeshtë, nuk ka fare më ato procedurat e tmerrshme. 7 ditë është procedura për të marrë punëtorë të huaj dhe po të them me këtë pagë që ke ti e ke të garantuar, kanë filluar të marrin edhe të tjerët, punëtorët e huaj nga Bangladeshi, nga Pakistani, India.
Pronari: I kam porositur 300 në Bangladesh, 400 dollarë paga. E kanë të përfshirë edhe fjetjen.
Rama: I ke pronto, nuk dinë as shqip të merren me thashetheme.
Pronari: Do të bëj një kat apostafat për ta.
Rama: Kur të fillojnë të mësojnë shqip fillo dhe ndërroji se fillojnë thashethemet, u hyn krimbi, jo politika, jo demokracia, jo liria.
Pronari: E kishim mbyll për të ardhur më herët po na ra pandemia. Po tani do të vazhdojmë ti marrim. 400 dollarë duan ata.
Rama: Janë punë, punë dhe nuk ka llafe.
Pronari: Janë punëtorë që punojnë tamam në makinat që duam ne. Janë profesionistë.
