Kryeministri i Kosovës, Albin Kurti, ka pohuar sot se Serbia jo vetëm që nuk i ndëshkon kriminelët e luftës, por disa prej përgjegjësve të gjenocidit ndaj shqiptarëve të Kosovës i afirmon në pozicione të larta politike.
Në një reagim në faqen e tij në Facebook, kreu i Vetëvendosjes cek krimet në Kosovë nga ana e ushtarëve serbë në mars të vitit 1999.
Ai shtoi se ndaj shqiptarëve janë bërë shumë krime gjatë asaj periudhe ndërsa ndëshkime ka pasur shumë pak.
Kurti theksoi se qeveria e tij do bëjë maksimumin për të mbyllur plagët e së kaluarës në mënyrë që të mund ecet përpara.
“Java e fundit e marsit 1999 ishte pëplot me vrasje e masakra të përditshme. Avokati Bajram Kelmendi me dy djemtë në Prishtinë, Kryesindikalisti Agim Hajrizi e veprimtari i shquar Latif Berisha në Mitrovicë, masakrat në Krushë të Madhe e të Vogël, në Suharekë e në Izbicë e deri tek ajo në Lubeniq së cilës ia shënojmë përvjetorin sot. Lubeniqi paraqet gjenocidin e kryer ndaj popullsisë civile.
Mbi 80 persona janë ekzekutuar në këtë vend, përfshirë këtu Muhametin e vogël vetëm 18 muajsh. Shumë krime ndaj nesh e aspak drejtësi për neve ndonëse u bënë 22 vjet që prej atëherë. Serbia në përgjithësi nuk i ndjek kriminelët e në veçanti disa prej përgjegjësve i afirmon lart në politikë e në shtet. Kosova dergjet nga pasiviteti special i prokurorëve të saj dhe joefikasiteti edhe më special i gjykatësve të saj.
Të paktën më 29 maj 2019 e patëm amandamentuar Kodin e Procedurës Penale për të mundësuar gjykimin dhe dënimin në mungesë të kriminelëve, por as kjo nuk po sjell rezultate sa duhet. Familjet në Kosovë vuajnë, pa adresim të së vërtetës, pa zhdëmtim, restaurim dhe rehabilitim që do t’ua sjellte sistemi i duhur i drejtësisë dhe strategjia e nevojshme e adresimit të së shkuarës. 22 vite pas luftës diskutimi mbi të kaluarën s’do të duhej të ishte në pikën ku është. Megjithatë, ne do të angazhohemi e të bëjmë më të mirën që mundemi e që dijmë për të mbyllur plagët e së kaluarës. Sepse vetëm ashtu mund të shikojmë qartë dhe ecim krenar kah e ardhmja. Ndryshe jo.” – shkruan Kurti.
