Një zyrtar i lartë rus ka paralajmëruar se Moska mund të ndërhyjë për të ndihmuar qytetarët e saj në Ukrainën lindore ndërsa tensionet rriten në rajon.
Luftimet sporadike janë rritur në rajonin e Donbas në Ukrainën Lindore, me përplasje midis rebelëve separatistë të mbështetur nga Rusia dhe trupave ukrainase.
Rusia ka angazhuar trupa në kufirin me Ukrainën.
Zyrtari, Dmitry Kozak, tha në një konferencë në Moskë, se forcat ruse mund të ndërhyjnë për të “mbrojtur” rebelët, raporton BBC.
“Gjithçka varet nga shkalla e konfliktit,” tha ai.
Donbas i Ukrainës ka qenë një pikë e ndezur që kur separatistët morën territore të mëdha në 2014.
Përleshjet e nivelit të ulët midis rebelëve dhe forcave ukrainase kanë shpërthyer javët e fundit.
Secila palë akuzon tjetrën për shkeljen e një armëpushimi.
Presidenti ukrainas Volodymyr Zelensky vizitoi rajonin të Enjten për të parë “vendet e përshkallëzimit” dhe “të jetë me ushtarët tanë në kohë të vështira në Donbas”.
Kancelarja gjermane Angela Merkel i ka bërë thirrje Rusisë që të zvogëlojë praninë e saj ushtarake në kufirin me Ukrainën.
