Këtë të martë, nis muaji i shenjtë i Ramazanit për besimtarët myslimanë. Me këtë rast, kreu i Komunitetit Mysliman të Shqipërisë Bujar Spahiu, i ka uruar besimtarët për nisjen e muajit të Ramazanit, ndërsa u ka kërkuar që të tregohen solidarë me familjet në nevojë.
Agjërimi i muajit të Ramazanit konsiston në privimin me vetëdije nga ngrënia dhe pirja prej agimit deri në perëndim të diellit.
Spahiu i ka uruar të gjithë besimtarët që të kenë një agjërim të lehtë dhe që Zoti t’i pranojë lutjet e tyre.
MESAZHI I KREUT TË KMSH-së
Me emrin e Zotit, Mëshiruesit, Mëshirëbërësit!
Të dashur qytetarë, motra dhe vëllezër, nesër më 13 prill, është dita e parë e Muajit të Bekuar të Ramazanit.
Me rastin e fillimit të muajit të Ramazanit, ju përcjell urimet më të sinqerta që ky Ramazan të jetë muaj i mëshirës së ndërsjellë mes njeri-tjetrit, muaj i faljes dhe mirëkuptimit, muaj i ngritjes morale dhe shpirtërore, për përballimin me sukses të sfidave në të cilat ndodhemi dhe ato që na presin.
Rrugëtimi ynë i përbashkët për të arritur kënaqësinë e Zotit kërkon motivim të lartë.
Ju ftoj që të jemi më solidarë me familjet në nevojë, t’i shtrijmë dorën njëri-tjetrit në punë të mbara!
Të nderuar besimtarë!
Çdo adhurim gjatë këtij muaji, ka vlerë shumëfish më të madhe. Prandaj, njerëzit përmes sakrificave të shumanshme personale, veprave të bamirësisë, vizitave tek njëri-tjetri, lënien anash të mospajtimeve etj., synojnë të arrijnë kënaqësinë e Zotit dhe harmoninë me njerëzit me të cilët rrethohen.
Duke u frymëzuar nga këto synime fisnike, uroj nga zemra që ky muaj të jetë muaj i faljes, mirëkuptimit, dashurisë, unitetit dhe paqes. Duke ju uruar muajin e Ramazanit, më lejoni t’ju dëshiroj një agjërim të lehtë, pranim të lutjeve tuaja, shëndet të mirë, lumturi e prosperitet për ju dhe familjet tuaja!
H. Bujar Spahiu
Kryetar i Komunitetit Mysliman të Shqipërisë
