Presidenti i vendit Ilir Meta e konsideron të pafalshme mosmbështetjen e bujësisë dhe të fermerëve nga qeveria. Madje thotë se kjo është rrënja e shpopullimit të vendit.
Ai reagon pas një shkrimi të publikuar në “Monitor”, sipas të cilit në programin e mbështetjes për bujqësinë vetëm 40% e fondeve kanë shkuar për fermerët.
Meta thotë se fondet e përcaktuara nga buxheti për bujqësinë janë 10 herë më pak se fatura, që do t’i paguhet biznesmenit Italian Francesco Becchettit.
“Mosmbështetja e bujqësisë dhe e fermerëve, është e pafalshme dhe rrënja e braktisjes së fshatrave dhe e shpopullimit të vendit.
Edhe ato pak fonde ‘mjerane’ të përcaktuara nga buxheti për Bujqësinë dhe që janë 10 herë më pak se fatura, që do t’i paguhet Becchettit, harxhohen në pjesën dërmuese për spote, konferenca, panaire dhe “kotësira” korruptive.
Plot 60 përqind e parave të subvencioneve shkojnë për pagesa jo produktive. Ndërsa vetëm ‘thërrimet’ përfundojnë te fermeret, të cilët të braktisur punojnë dhe prodhojnë me kosto 40% më të lartë se fqinjët në rajon.
Prandaj 25 Prilli, është referendum popullor për shumë më tepër para dhe mbështetje për Bujqësinë dhe fshatin.”– shkruan presidenti Meta.
