Një qendër e vaksinimit masiv në qytetin francez të Nicës është mbyllur herët këtë fundjavë pasi u administruan vetëm 58 nga 4 mijë dozat që ishin në dispozicion.
Kjo qendër ishte ngritur për të ofruar doza vaksinash për njerëzit mbi 55 vjeç që punojnë në punë që i lënë ata veçanërisht të ekspozuar ndaj virusit, siç janë mësuesit dhe oficerët e policisë.
Por kur ata që do vaksinoheshin mësuan se dozat ishin nga kompania Astra Zeneca ata u larguan pa pranuar ta marrin vaksinën, kështu qendra u mbyll pas vetëm disa orësh të shtunën.
“Ne kishim vetëm 58 persona që u shfaqën këtë mëngjes për 4 mijë doza të vaksinës që kishim në dispozicion.”– tha të shtunën Benoit Huber, shefi i stafit të prefektit në Alpes-Maritimes, citon Euronews.
Ndërkohë prefektura tjetër e Grasse argumentoi se pjesëmarrja e ulët mund të jetë për faktin se zona e Alpes-Maritimes ka vetëm 3 mijë mësues mbi moshën 55 vjeç, dhe shumë prej tyre do ta kenë marrë dozën e tyre të parë.
Por nënprefektja Anne Frackoëiak-Jacobs gjithashtu tha France 3: “Kishte njerëz që u kthyen kur e morën vesh se ishte AstraZeneca”.
Franca ishte një prej shumë vendeve evropiane që pezulloi për pak kohë përdorimin e AstraZenecës në muajin Mars, pasi një numër i vogël i njerëzve që morën vaksinën pësuan mpiksje të gjakut.
Mirëpo pasi Agjencia Evropiane e Barnave (EMA) këshilloi që përfitimet e AstraZenecës tejkalonin rreziqet, vaksinimi me Astra Zenecën rifilloi. Sidoqoftë, Franca e kufizoi përdorimin e saj për njerëzit e moshës mbi 55-vjeç.
