Është proceduar penalisht ish-kreu i Policisë Bashkiake Florenc Hoxha, pasi akuzohet se ka dhunuar një 36-vjeçar, për shkak se pretendonte se shpërndante ushqime për fushatë.
Incidenti ka ndodhur në Vaqarr, ku Hoxha i ka bllokuar rrugën mjetit, në të cilin udhëtonte 36-vjeçari Bledar Goga.
Rasti është bërë publik fillimisht nga administratori i Vaqarrit, Gentian Myrta i cili shprehet se ushqimet po shpërndaheshin për shtrimin e një iftari për banorët e lagjes Ibra në Vaqarr.
“100 banorë të lagjes Ibra, në Vaqarr, sot presin të çelin iftarin, falë dhe bujarisë së shoqatës Firdeus. Por dhuna e ushtruar nga Florenc Hoxha dhe ‘krushqit e tjerë të inatosur’ të shpurës së dhëndrit Basha, ndaj djemve shërbëtorë, e ka ndaluar shpëndarjen e ushqimit.”– tha dje Myrta.
Përfaqësuesi i Partisë Demokratike pretendonte se në mjet kishte ushqime të ndryshme, që do të shpërndaheshin në këmbim të votës. Hoxha u konfliktua me 36-vjeçarin Goga duke e goditur me grusht. Materialet u referuan në Prokurori si për dhunën e ushtruar nga Florenc Hoxha, ashtu edhe për pretendimet e PD për blerje votash.
