Kreu i Shtetit Ilir Meta ka zhvilluar ditën e sotme dy takime me Ambasadorin e Britanisë Duncan Norman dhe Ambasadorin e Prezencës së OSBE-së, Vincenzo Del Monaco.
Presidenti Meta shkruan në rrjetet sociale se arsyeja e takimit ka qenë informimi për ecurinë e procesit zgjedhor në Shqipëri.
Më tej në deklaratën e shpërndarë për mediat, thuhet se Presidenti i ka njohur diplomatët me denoncimet e qytetarve dhe të subjekteve politike për parregullsitë gjatë fushatës zgjedhore.
“Prita sot në takime të veçanta, Ambasadorin e Mbretërisë së Bashkuar në Tiranë, Sh.T.Z. Duncan Norman dhe Ambasadorin e Prezencës së OSBE në Tiranë, Sh.T.Z. Vincenzo Del Monaco, për t’i informuar me ecurinë e procesit zgjedhor në Shqipëri.
Mirëprita angazhimin dhe interesin e tyre për një proces zgjedhor, që plotëson standardet ndërkombëtare të zgjedhjeve të lira dhe të ndershme.
I njoha Ambasadorët me denoncimet e shumta të qytetarëve dhe subjekteve politike për parregullsi serioze të konstatuara gjatë fushatës zgjedhore, që duhet të kishin marrë menjëherë përgjigjen e shpejtë dhe të prerë të institucioneve përgjegjëse, duke parandaluar çdo përshkallëzim tjetër.
Theksova se është me rëndësi jetike për integritetin e procesit zgjedhor, që Policia e Shtetit dhe institucionet gjyqësore, gjatë ditëve në vazhdim të reagojnë në mënyrë të menjëhershme me profesionalizëm, paanshmëri të plotë dhe në përputhje me ligjin kundër çdokujt, që do të guxojë të kryejë krim zgjedhor.
U kërkova Ambasadorëve angazhimin e tyre në vëzhgimin e zgjedhjeve, veçanërisht në Qarqet, që kanë shënuar edhe numrin më të lartë të denoncimeve zyrtare, për të cilat janë informuar hollësisht edhe të gjithë ambasadat e vendeve partnere.
Ripërsërita bindjen e tij të plotë se qytetarët do të marrin pjesë masivisht në këto zgjedhje, duke i bërë shërbimin më të mirë vendit dhe të ardhmes së pakthyeshme europiane”-shkruan Meta.
