Kandidatja e Nismës Thurje, Rudina Hajdari ka reaguar pas humbjes që pësoi në zgjedhjet e 25 Prillit. Ajo nuk arriti dot ta fitonte mandatin e deputetes në qarkun e Elbasanit, megjithatë i falenderoi të gjithë qytetarët që e kanë mbështetur.
“Dua ta nis me një falenderim për të gjithë ata qytetarë të Qarkut të Elbasanit të cilët më mbështetën dhe votuan në zgjedhjet e datës 25 Prill.
Fatkeqësisht nuk arritëm të prodhonim një mandat përfaqësues në Parlament, por premtimi im se do të jem me ju dhe pranë jush në 4 vitet e ardhshme, mbetet i pandryshuar.
Do mundohem që me gjithë forcat që kam të mobilizoj sa më shumë energji pozitive për të artikuluar publikisht problemet akute që ka Qarku i Elbasanit, duke nisur nga insfrastruktura e rrënuar me rrugë pa rrugë, pa ujë të pijshëm apo për vaditje, pa kanalizime e pa akses në energji.”- thotë Hajdari.
Në mesazhin e publikuar në llogarinë e saj në “Facebook”, Hajdari shprehet se ajo çfarë lexonte nga rezultati i zgjedhjeve është se kanë triumfuar politikanët e lidhur me krimin e organizuar.
Sipas saj, personazhe anonimë të cilët nuk kanë diskutuar për ndonjë ide dhe as nuk njihen në publik, po rezultojnë si më të votuarit nga qytetarët.
“Do mundohem mbi të gjitha të flas më qartë e të shpjegoj më mirë dëmin që i shkaktohet Qarkut të Elbasanit e gjithë vendit nga krimi i organizuar dhe politikanët e lidhur me të.
Ajo që unë lexoj nga rezultati i zgjedhjeve është se politikanët e lidhur me krimin e organizuar kanë triumfuar.
Personazhe anonimë, të cilët nuk njihen në publik, nuk kanë artikuluar kurrë asnjë ide politike, nuk kanë asnjë vlerë përveç lidhjes me botën e krimit, po rezultojnë si njerëz të votuar nga qytetarët.
Unë refuzoj të besoj se shqiptarët duan të drejtohen nga organizata kriminale, por e di se shumë shqiptarë nuk votojnë dot të lirë për shkak të varfërisë apo presionit e shantazhit.
Ky është problemi më i madh që ka vendi sot dhe ne të gjithë duhet ta shohim në sy e të bëjmë gjithë çka mundemi për ta zgjidhur.
Duhet të flasim më shumë me qytetarët, duhet të tregojmë më qartë me fakte realitetin, duhet të presojmë më shumë gjyqësorin, duhet të luftojmë më fort e më bindshëm.
Shqipëria është një vend i mrekullueshëm dhe shqiptarët njerëz të mirë e punëtorë, por krimi i mbështetur fort nga politikanët e vjetër e të korruptuar ka hedhur rrënjë të thella.
Ne humbëm një betejë por jo luftën.
Luftën do e fitojmë me shqiptarët e për Shqipërinë.
Do të vazhdojmë!
Faleminderit sërish dhe rishihemi shumë shpejt”- shkruan deputetja Hajdari, të cilën nuk do ta shohim më në Parlamentin e ardhshëm.
