Gjendet e vdekur sekretarja e parë në ambasadën zvicerane në Teheran këtë të martë, pasi ka rënë nga një ndërtesë e lartë ku ajo jetonte në veri të qytetit.
Siç shkruan “Reuters”, ministria e jashtme zvicerane (FDFA) tha se një punonjës në ambasadën e saj në Iran kishte vdekur nga një aksident, por pa identifikuar viktimën. “FDFA dhe këshilltari i saj federal Ignazio Cassis janë shokuar nga vdekja tragjike dhe i shprehin ngushëllimet e tyre më të thella familjes.”-thuhej në njoftim.
Zëdhënësi i Shërbimeve të Urgjencës iraniane Mojtaba Khaledi tha se trupi i diplomates u gjet nga një kopshtar, pasi një punonjës që mbërriti herët këtë të martë në banesën e saj kishte vënë re se ajo ishte zhdukur.
“Ky person ishte sekretarja e parë e ambasadës zvicerane.”– i tha Khaledi agjencisë së lajmeve Mehr. “Shkaku i rënies së saj ende nuk është përcaktuar.”
Diplomatja ishte 51 vjeç.
Zvicra ka përfaqësuar interesat diplomatike të SHBA-ve në Iran që kur Uashingtoni dhe Teherani ndërprenë lidhjet menjëherë pas Revolucionit Islamik të vitit 1979.
