Biznesmeni vlonjat Bledar Birçaj, u ekzekutua mesditën e djeshme me breshëri arme në zonën e njohur si “Bishti i Kalldrëmit” në Vlorë.
Ai po lëvizte me një mjet “BMW X5” dhe ishte i shoëruar me një mikun e tij, agjent të antidrogës.
Pasagjeri që ndodhej në makinë me Birçajn, një person që shfaqet duke u larguar me vrap nga vendngjarja dhe në videon e mëposhtme të publikuar mbrëmjen e kaluar në studion e emisionit “Opinion”.
Sipas “Newsbomb” shoqëruesi i Birçajt që shpëtoi pa e kapur asnjë nga 30 plumbat e qëlluara në drejtim të tyre, është një agjent i antidrogës, i identifikuar me inicialet G.C.
Në dëshminë e tij para hetuesve, agjenti ishte shprehur se ishin kapur të papërgatitur kur i kanë zënë në pritë.
“Ishim të papërgatitur, na bënë pritë. Ramë direkt pre e breshërisë së kallashnikovit. Pashë dy veta me maska por nuk i njoha dot. Ishin të kamufluar. Nuk jam në dijeni të ndonjë konflikti të fundit.”– është shprehur ai.
Bledar Birçaj ishte pronar i një lokali në Lungomare, “THE BOSS”.
10 vite me parë ai dhe i vëllai dhunuan juristin e Hipotekës së Vlorës ndërsa në vitin 2011, ai u arrestua në Vlorë si i dyshuar për vrasje por në prill u lirua.
Në korrik 2011, çështja ndaj Birçajt u pushua nga ana e prokurorisë. Viktima lëvizte shpesh në drejtim të Spanjës dhe vetëm një muaj më parë ishte kthyer në Vlorë.
