Gjykata Kushtetuese ka rrëzuar padinë e parë lidhur me zgjedhjet lokale të 30 qershorit të 2019-ës. Më saktë, gjykata ka vendosur të mos kalojë në seancë plenare kërkesën e Partisë Konservatore të drejtuar nga Kujtim Gjuzi, për shfuqizimin e zgjedhjeve lokale të 30 qershorit 2019.
Në vendim thuhet: “Për legjitimimin e partive politike, Gjykata Kushtetuese ka vlerësuar se mundësia e tyre për të vënë në lëvizje kontrollin kushtetues ekziston kur ato kundërshtojnë dispozitat e akteve normative, të cilat cenojnë statusin e tyre kushtetues dhe, bashkë me të, edhe pjesëmarrjen e tyre në ushtrimin e vullnetit shtetëror. Të tilla mund të jenë aktet që përcaktojnë deklarimin e pasurive, financimin e tyre nga shteti ose subjekte të tjera, dhënien e shansit të barabartë të gjitha partive për të marrë pushtetin, mënyrën e organizimit dhe të ushtrimit të veprimtarisë së tyre politike jo vetëm gjatë zgjedhjeve, por edhe në periudhën midis tyre”.
Padia u shqyrtua nga anëtarët e Gjykatës Kushtetuese: Kryetarja Vitore Tusha dhe anëtarët Elsa Toska, Marsida Xhaferllari, Fiona Papajorgji, Altin Binaj, Sonila Bejtja, Përparim Kalo.
