Pas konfliktit gjithnjë në rritje mes Izraelit dhe Hamasit që prej disa ditësh është përshkallëzuar, ka reaguar Ministria e Jashtme e Kosovës.
Kosova u është bashkuar Shteteve të Bashkuara të Amerikës, Shqipërisë e dhjetra shteteve të tjera, që i kanë dalë në krah Izraelit.
Në një postim në llogarinë zyrtare në “Twitter”, Ministria e Jashtme thotë se Izraeli ka të drejtën dhe detyrimin për të mbrojtur popullin e tij kundër sulmeve të Hamasit.
“Si çdo shtet, Izraeli ka të drejtën dhe obligimin për të mbrojtur popullin e tij kundër 2000 raketave të qëlluara mbi civilët vetëm nga Hamasi, i cili po mban peng civilët palestinezë në luftën e tij. Ne vajtojmë të gjitha viktimat. Ne kërkojmë që të përmbahemi, të ndalojmë dhunën dhe të kërkojmë zgjidhje paqësore.”- thuhet në reagimin e Ministrisë së Jashtme të Kosovës.
Konflikti mes forcave izraelite dhe palestineze u intensifikuan që nga e hëna, ndërsa përgjatë gjithë javës ka patur sulme me raketa nga të dyja palët.
