Ish-presidenti Nishani ka thënë sot se Lulzim Basha dështoi që ta kthente PD-së në parti fituese përpos faktit që përballë kishte një qeveri që në tetë vitet e qeverisjes së saj ka dështuar, ka rritur korrupsionin, ka shkatërruar institucionet e është përfshirë në skandal pas skandali.
Ai tha se dje PD e kishte mundësinë të shprehte vullnetin, të skiconte platformën e të ringrihej.
“Të dashur miq demokratë! Dje ishte një ditë shumë e rëndësishme për Partinë Demokratike, por pa e tepruar edhe për Shqipërinë ! Për Partinë Demokratike, pasi ishte rasti të shprehej vullneti, skicohej platforma dhe krijohej hapësira për të nisur një proces të vërtetë reformimi, ringritje, bashkimi, forcimi me synim kryesor kthimin e besimit të shumicës së shqiptarëve tek Partia Demokratike. Për Shqipërinë, sepse është domosdoshmëri ekzistenca e alternativës qeverisëse ndaj një qeverie e cila pas 8 (tetë) vitesh dështimesh, korrupsioni, skandalesh, shkatërrimi institucionesh do vijojë të bëhet edhe më arrogante, më e korruptuar, më e dhunshme, më mospërfillëse, më tradhtare! Por për fatin e keq të Partisë Demokratike dhe Shqipërisë, lidershipi aktual e posaçërisht L. Basha pasi dështuan ta ngrenë PD në parti të parë e fituese para 25 prillit tani nisën çmontimin e çdo vlere, trashëgimie pozitive, mundësie ringritje dhe transformimi qytetar të Partisë Demokratike!” – shkruan Nishani në Facebook.
Ai shton më tej se kreu i PD-së Basha, në mbledhjen e djeshme jo vetëm që është tallur e i ka gënjyer demokratët por ka pohuar hyrjen në parlament në shtatot, duke e kthyer PD në një fasadë të masakrës elektorale.
Sipas Nishanit, Bashës i intereson vetëm vula dhe karrigia e pushtetit dhe nuk i interesojnë halli e vuajtjet e mijëra demokratëve duke e cilësuar si farsë shpalljen e zgjedhjeve për kreun e partisë.
“Dje, L. Basha përtej retorikës tallëse e të gënjeshtërt ndaj demokratëve, konfirmoi se në shtator do të hyjë në Parlament, çka konfirmon kthimin e PD në një fasadë të masakrës elektorale. L. Bashës i intereson veç vula dhe karrigia e vulëmbajtësit dhe aspak fare, halli, vuajtjet, sakrificat e mijëra demokratëve apo kolapsi i shtetit të shqiptarëve. Deri dje, L. Basha, ankohej pse kritikët nuk prisnin përfundimin e ankimimeve, hetimeve të kasapanës, por vetë nuk priti as të dëgjojë zërin e demokratëve të bazës, të shqiptarëve të thjeshtë se çfarë mendojnë ata e në mesnatë shpalli farsën e rradhës për vulën dhe karrigen e vulëmbajtësit të Partisë Demokratike, pa mbaruar as afatet e përmbylljes së ankimeve që ka bërë po vetë !!!!!!! Shërbim më të denjë ndaj masakruesit të zgjedhjeve, dhunuesit të demokratëve, shkatërruesit të Shqipërisë, që është Edi Rama, nuk mund të ketë.” – shton ish-presidenti në reagimin e tij.
Në fund Nishanis shton se misioni i vërtetë i Bashës po qartësohet përditë e më shumë. Sipas ish-presidentit, që është pjesë e grupit të kundërshtarëve të kryedemokratit, ajo që ka nisur dje në selinë blu është fillimi i fundit politik të Bashës dhe platformës për asgjësimin e PD-së.
Tashmë misioni i vërtetë i L. Bashës po kuptohet e qartësohet çdo ditë e më mirë. Nuk ka asnjë merak për të respektuar sakrificat e demokratëve, asnjë dëshirë për fitoren e PD, asnjë synim për të ndihmuar e shpëtuar Shqipërinë. Një kryetar i cili merr vendime në një sallë me më pak se 100 (njëqind) persona të pranishëm, ku domosdoshmërisht duhet të jenë mbi 200 (dyqind) të tillë, një kryetar që përcakton për konkuruesit e tjerë vetëm 16 (gjashtëmbëdhjetë) ditë për të bërë fushatë në 60 (gjashtëdhjetë) degë, qartëson fare mirë qëllimin e vërtetë! Qëllimi është Vula dhe Karrigia e vulëmbajtësit e jo rritja e Partisë Demokratike, as zhvillimi i Demokracisë si vlerë e jo e jo sakrifica e puna për të ndryshuar Shqipërinë ! Në të vërtetë kjo që nisi dje është fillimi i fundit politik të L. Bashës dhe platformës së asgjesimit të Partisë Demokratike ! Nga dje ka nisur një përgjegjësi dhe detyrë historike për Demokratët anekënd Shqipërisë. Për PD.” – mbyll reagimin Nishani.
