Lumi më i shenjtë i Indisë, Ganga, është tejmbushur me trupa të pajetë në ditët e fundit. Siç shkruan BBC, qindra kufoma janë gjetur duke notuar në lumë ose të groposura në rërën pranë brigjeve të tij. Ata që jetojnë afër vendit ku më parë laheshin, në shtetin verior të Uttar Pradesh, kanë frikë se bëhet fjalë për viktima të Covid-19.
India është mbingarkuar nga një valë e dytë shkatërruese e pandemisë në javët e fundit. Ajo ka regjistruar më shumë se 25 milion raste dhe 275 mijë vdekje, por ekspertët thonë se numri i vërtetë i të vdekurve është disa herë më i lartë.
Trupat në brigjet e lumit, së bashku ata që digjen gjatë gjithë ditës në krematoriume të cilat s’kanë më vend, tregojnë historinë e një numri të vdekurish të paparë dhe të papranuar në të dhënat zyrtare.
BBC foli me reporterët lokalë, zyrtarët dhe dëshmitarët okularë në disa nga rrethet më të prekura të Uttar Pradesh dhe zbuloi se pas historisë së trupave që lundrojnë në lumë qëndrojnë besimet tradicionale, varfëria dhe një pandemi që vret njerëzit me shpejtësinë e rrufesë.
Shtretërit e lumenjve të mbushur me varre
Tmerri në Uttar Pradesh për herë të parë doli në dritë më 10 maj kur 71 kufoma dolën në bregun e lumit në fshatin Chausa të Biharit, afër kufirit shtetëror.
Mbikëqyrësi i policisë për zonën, Neeraj Kumar Singh, i tha BBC-së se autopsitë u kryen në trupat kryesisht të dekompozuar, u morën mostra të ADN-së dhe trupat u varrosën në gropa afër bregut të lumit.
Zyrtarët thanë se disa prej mbetjeve mund të ishin pjesë të trupave që kishin gjetur rrugën e tyre në lumë pas kremtimeve rutinë në brigje, por ata dyshuan se kufomat ishin hedhur në lumë. Policia instaloi një rrjetë përtej ujit për të kapur më shumë.
Një ditë më vonë, dhjetëra trupa shumë të dekompozuar u gjetën të shpërndara në bregun e lumit në fshatin Gahmar në rrethin Ghazipur të Uttar Pradesh, me qen të egër dhe sorra që festonin mbi ta.
Njerëzit e zonës thanë se trupat kishin pluskuar në ujë për disa ditë, por autoritetet i kishin injoruar ankesat e tyre në lidhje me erën e keqe derisa lajmet për kufomat e gjetura në rrjedhën e poshtme të lumit dolën në titujt e lajmeve. Dhjetëra trupa të dekompozuar që lundronin në lumë gjithashtu u gjetën nga fshatarët në rrethin Ballia kur ata shkuan për zhytjen e tyre në mëngjes në lumin më të shenjtë të Indisë. Gazeta Hindustan raportoi se policia tërhoqi 62 kufoma.
