Ndërsa Elbasani është nën sundimin e krimit prej shumë kohës tashmë, kryetarja gjykatës Enkeleda Kapedani gjen kohën të lazdrohet në TikTok.
Qyteti është kthyer në kasaphanë me ekzekutime të njëpasnëshme dhe ku sundimi i ligjit dhe prania e shtetit ka qenë thuajse inekzistente prej shumë vitesh me një situatë që ka ardhur duke u rënduar.
Dhjetëra persona janë ekzekutuar vetëm muajt e fundit në Elbasan, që njihet për përplasjet e forta mes bandave të drogës.
Para pak kohësh qyteti u trondit nga një përplasje me armë ku humbi jetën Pjerin Xhuvani e u plagosën katër persona të tjerë, një ngjarje e rëndë që ndodhi vetëm dy ditë para zgjedhjeve të 25 prillit dhe në prani të dhjetëra efektivëve të policisë.
Pavarësisht gjithçkaje, kryetarja e Gjykatës së Elbasanit, Kapedani, duket e imunizuar dhe pashqetësuar nga e gjithë situata e rëndë që mbizotëron në qytet dhe gjen kohën të argëtohet në TikTok me video nga më të ndryshme duke ekspozuar veshjet.
Madje nën ritmet e muzikës në njërën prej shumë videove të publikuara prej saj dëgjohet në sfond: ‘Jam mafia, mafia, mafia’.
“Hashtag.al” u informua mbi performancën e saj në TikTok nga disa punonjës në policinë e shtetit dhe në prokurori, të cilët prej vitesh e konsiderojnë zonjën Kapedani si një gjyqtare problematike sa i takon lirimit të elementëve kriminalë.
E emëruar në këtë gjykatë në tetor të vitit 2015, ajo u emërua kryetare e Gjykatës së Elbasanit në 30 shtator 2020. Në dhjetor 2019, Kapedani ka liruar nga burgu Viktor Ymerin e bandës së Gaxhait.
Pas qarkullimit të videove në internet, ILD nisi një hetim disiplinor ndaj Kapedanit, ndërsa më pas KLGJ e ka pezulluar deri në fund të hetimeve kryegjyqtaren e Elbasanit.
Kapedani u detyrua të reagonte duke kërkuar ndjesë për këdo që është ndier keq nga ato video. Ajo u shpreh se shpërndarja e këtyre videove ka si qëllim t’i dëmtojë asaj imazhin, ndërsa la të hapur mundësinë që fëmijët e saj mund t’i kishin publikuar ato fillimisht./Hashtag.al
