Kryebashkiakja e Shkodrës Ademi ka reaguar pas shkarkimit të saj si kryetare e Shoqatës së Bashkive të vendit.
Ajo shkruan se shqyrtimi e vendimi për ligjshmërinë e zgjedhjeve lokale të vitit 2019 është një nga 15 kushtet që Shqipëria duhet të përmbushë për çeljen e negociatave me BE-në.
Ajo shton më tej se jo vetëm Shoqata e Bashkive, por edhe shoqëria civile, qytetarët, SHBA-ja, BE-ja e KE-ja janë në pritje të vendimit të Gjykatës Kushtetuese.
Ademi thekson se eksponentë të PS-së kanë tentuar sot të dëmtojnë demokracinë ndërsa shton se çdo veprim me prapavijë politike cenon hapur parimet e shtetit ligjor dhe se Shoqata e Bashkive do i shkojë deri në fund vullnetit të saj për të respektuar vendimin përfundimtar të Gjykatës Kushtetuese.
“Shqyrtimi dhe vendimi për ligjshmërinë e zgjedhjeve lokale 2019, është një ndër 15 kushtet që Shqipëria duhet të përmbushë për çeljen e negociatave për anëtarësimin në BE, kushte të dakordësuara në takimin e Ministrave për Europën. Ritheksojmë se Shoqata e Bashkive të Shqipërisë, shoqëria civile në Shqipëri, qytetarët shqiptarë, Shtetet e Bashkuara të Amerikës, Bashkimi Evropian, Këshilli i Evropës, të gjithë partnerët dhe organizatat ndërkombëtare, janë në pritje të vendimit të Gjykatës Kushtetuese.
Në Lezhën e Besëlidhjes, sot eksponentë të Partisë Socialistë tentuan të dëmtojnë Demokracinë. Sot pati një tentativë për të kapur ilegalisht Shoqatën e Bashkive të Shqipërisë, veprime te ndërmarra nga eksponentë, anëtarë të Partisë Socialiste, pa të drejta legjitime dhe jo anëtarë Shoqatës së Bashkive të Shqipërisë. Çdo veprim me prapavijë politike dhe arbitrare cënon hapur parimet e shtetit ligjor dhe demokracisë vendore. Shoqata e Bashkive të Shqipërisë konsideron se demokracia lokale dhe sundimi i ligjit kanë rëndësi madhore për integrimin e vendit tonë. Shoqata e Bashkive të Shqipërisë është e vendosur për të vijuar deri në fund duke shprehur vullnetin e saj për të respektuar ligjin dhe vendimin përfundimtar të Gjykatës Kushtetuese.” – shkruan Ademi.
