Aktorja amerikane Lisa Banes ka vdekur në moshën 65-vjeçare pas një aksidenti me skuter në Nju Jork.
Policia e Nju Jorkut konfirmoi për BBC se Banes u godit nga një skuter ndërsa ecte në një vendkalim për këmbësorë në Manhattan më 4 qershor.
Ajo u dërgua në spital pasi kishte marrë një goditje të fortë në kokë dhe të hënën ndërroi jetë. Policia tregoi se personi që e goditi aktoren me skuter nuk ndaloi por vijoi rrugën e tij, duke e lënë Banes të shtrirë në rrugë.
“Nuk ka arrestime dhe hetimi mbetet në vazhdim.”- tha policia. Aktori dhe regjisori Seth MacFarlane u shpreh se vdekja e Banes ishte “një humbje e jashtëzakonshme”.
Lisa Banes ishte ndoshta më e njohur për rolin e saj si Marybeth Elliott, nëna e Amy-t në filmin “Gone Girl”.
