Përfundon edicioni i parë i “Tiranathlone” në Tiranë, një aktivitet i tregarëshit, i organizuar nga Bashkia e Tiranës dhe Ambasada e Greqisë në vendin tonë.
Të dy fituesit e vendit të parë u shpallën dy atletë nga Greqia, Stefani Polihroniadis nga femrat dhe Panagiotis Bitados nga meshkujt.
Liqeni i Farkës në kryeqytet u kthye ditën e sotme në një arenë garash sportive.
Për gati tre orë sportdashësit kanë garuar në ambientet krejtësisht të reja të “Parkut Helen” në Liqenin e Farkës në tre disiplina: not, çiklizëm dhe ecje sportive.
Pjesëmarrësit nga Gjermania, Italia, Mali i Zi, Maqedonia e Veriut, Austria dhe natyrisht edhe nga Shqipëria dhe Greqia u angazhuan në gara noti 750 metra, garë çiklistike 20 km, dhe ecje sportive 5 km për burra dhe gra.
Në përfundim janë shpërndarë edhe çmimet për sportistët që kryesuan në këto gara. Fituese e Tiranathlone për femrat është shpallur Stefani Polihroniadis, nga Greqia, e ndjekur nga Deborah Keci dhe Rita Zeqiri nga Shqipëria.
Ndërsa për kategorinë e meshkujve, fitues janë Panagiotis Bitados nga Greqia si dhe, Strahinja Trakic dhe Panagiotis Polyzos.
