‘Çdo hap që hedhim’ mund të monitorohet, analizohet e keqpërdoret globalisht, paralajmëron mbikëqyrësi i të dhënave në Britani
Kreu i Zyrës së Informacionit në Britani (ICO) ka ngritur alarmin mbi abuzimet e mundshme të softuerit të njohjes së fytyrës, pasi disa hetime zbuluan se teknologjia nuk po vendosej siç duhet.
Komisionerja Elizabeth Denham vuri në dukje se teknologjia e njohjes së fytyrës mund të shfrytëzohet për të bërë jetën tonë më efikase dhe të sigurt, por tha se ekziston një rrezik i qartë që ajo mund të keqpërdoret.
Teknologjia e drejtpërdrejtë e njohjes së fytyrës (LFR) e aftë për të skanuar fytyrat e njerëzve në kohë reale ndërsa ecin në rrugë ose hyjnë në një dyqan mund të përdoret ‘në mënyrë të papërshtatshme’ tha ajo duke theksuar se kjo hap rrugën për mbledhjen e të dhënave personale të ndjeshme në një shkallë të madhe ndërkohë që vetë personat nuk do e dinin se po monitorohen.
“Ne duhet të jemi në gjendje t’i çojmë fëmijët tanë në një kompleks argëtimi, të vizitojmë një qendër tregtare ose të vizitojmë një qytet për të parë pamjet pa mbledhur dhe analizuar të dhënat tona biometrike me çdo hap që hedhim.”
Denham tha se, ndryshe nga CCTV, LFR është në gjendje të identifikojë individët në kohë reale dhe ‘menjëherë t’ju profilizojë’. Ndërsa teknologjia mund të përdoret për qëllime më dashamirëse të tilla si krijimi i reklamave të personalizuara, ajo gjithashtu mund të çojë në një mbikëqyrje më të madhe.
Ajo vuri në dukje gjashtë hetime të ICO-së për përdorimin, testimin dhe vendosjen e planifikuar të sistemeve LFR në Mbretërinë e Bashkuar, duke vënë në dukje se asnjë nga organizatat e përfshira në sondazhe nuk ishte në gjendje të justifikonte plotësisht pse po përdorte teknologjinë dhe asnjëra nuk ishte plotësisht në përputhje me rregulloret sipas ligjeve të mbrojtjes së të dhënave. Si rezultat, të gjitha organizatat e përfshira në hetime ndaluan përdorimin e tyre të teknologjisë LFR.
Përgatiti për Hashtag.al, Klodian Manjani
