Deputetja e zgjedhur e PD-së për Parlamentin e ardhshëm, Jorida Tabaku, thotë se bizneset shqiptare paguajnë 3 herë më shumë korrupsion në raport me 8 vite më pare.
Ajo i referohet një raporti të BERZH-it dhe Bankës Botërore. Zonja Tabaku shprehet se korrupsioni është oksigjeni i kësaj maxhorance që sipas saj stimulon pandershmërinë dhe paligjshmërinë.
Sipas Tabakut, PS mund të ofrojë vetëm vjedhje dhe korrupsion si formë qeverisjeje.
“Një shtet i kapur nga korrupsioni, që fut duart në xhepat e sipërmarrjeve dhe qytetarëve. Kjo është e vërteta e Shqipërisë që pasqyrohet edhe nga Banka Botërore dhe BERZH.
Të dytët në botë për korrupsionin, me zyrtarë që mbushin portofolet nga taksat e shqiptarëve dhe u heqin fitimet bizneseve të shqiptarëve.
3 herë më shumë korrupsion paguajnë bizneset shqiptare në raport me 8 vite më parë!
Ky nuk është as raporti i vetëm dhe as raporti i fundit ndërkombëtar që tregon natyrën e vërtetë të regjimit të korruptuar që shqiptarët kanë përballë.
Korrupsioni është oksigjeni i kësaj mazhorance prandaj ajo stimulon pandershmërinë dhe paligjshmërinë.
Një regjim që vjedh zgjedhjet mund të ofrojë vetëm vjedhjen dhe korrupsionin si formë qeverisje!”- shkruan Tabaku.
