Më shumë se 150 punonjës të një spitali në Hjuston kanë dhënë dorëheqjen ose janë pushuar nga puna që nga e Marta.
Kjo për shkak të politikës së fundit të spitalit, që kërkonte që punonjësit e tij të vaksinohen kundër COVID-19 deri të hënën.
Siç raportojnë mediet lokale, 153 punonjës të Spitalit Metodist të Hjustonit dhanë dorëheqjen ose u pushuan nga puna, vetëm për shkak se refuzuan të kryenin vaksinën.
Zëdhënësja Patti Muck tha se spitali ka rreth 25 mijë punonjës dhe pothuajse të gjithë e kanë respektuar politikën.
Shkarkimet vijnë pas disa javë diskutime ku punonjësit e spitalit zhvilluan protesta dhe ngritën një proces gjyqësor kundër spitalit, duke pretenduar që politika shkel të drejtat e tyre.
“Jam shumë e lumtur dhe e lehtësuar.”- tha të martën Jennifer Bridges, një nga paditësit kryesorë në padi. “Unë nuk dua të kem të bëj me këtë spital”.
Largimi masiv i punëtorëve erdhi pasi një gjykatës e refuzoi këtë padi. Por Bridges, u zotua se do ta dërgojë rastin deri në Gjykatën Supreme, “nëse është e nevojshme“.
