Ish-i dërguari special i ish-Presidentit Donald Trump për dialogun Kosovë-Serbi, Richard Grenell, ka marrë kërcënime në rrjetet sociale nga disa shqiptarë.
Njëri prej tyre i shkruan: “Kur të vish në Shqipëri do të të presim kokën. Po të presim të gjithë. Ne nuk harrojmë, mbaje mend këtë”.
Ndërsa një tjetër i ka dërguar imazhe me thika, për ta paralajmëruar se ato e presin në Shqipëri.
Grenell ka reaguar pas këtyre mesazheve në një postim në llogarinë e tij zyrtare në “Instagram”, ku shprehet se këto mesazhe nuk reflektojnë shqiptarët dhe se ai do i drejtohet policisë.
“Kjo nuk reflekton shqiptarët, ky person duhet të raportohet tek Policia lokale.
Dhuna dhe homofobia janë të neveritshme. Unë jam gjithmonë i lumtur të lexoj komente të menduara, por njerëzit nuk e dëgjojnë mendimin tuaj kur ju bëni kërcënime fizike.”– shkruan Grenell.
E gjitha kjo vjen pas një përplasjeje mes tij dhe ambasadores së Kosovës në SHBA, Vlora Çitaku.
Kjo e fundit ishte e irrituar për një postim të Grenellit, i cili përshëndeste ditën nacionaliste serbe të Vidovidanit.
Në 28 qershor sipas kalendarit Gregorian serbët kujtojnë vrasjen e Princit Lazar në betejën e Kosovës kundër Osmanëve një ditë të cilën e kanë kthyer në ditë fetare dhe nacionale, e cila më pas u kthye në pikë të rëndësishme për formimin e identitetit serb.
