Goditet një tjetër rast i mosdeklarimit të të hollave në kufi.
Një 37-vjeçar nga Kosova është ndaluar në Rinas, pasi po udhëtonte me një shumë të madhe parash të padeklaruara.
37-vjeçari me inicialet SH.Th., mbante në çante 15 mijë euro.
“Sekuestrohen 15000 euro, procedohet penalisht 37-vjeçari nga Kosova.
Shërbimet e Policisë Kufitare në Rinas, në vijim të kontrolleve të imtësishme, në bazë të analizës së riskut, në dalje në PKK Rinas, kanë kaluar në vijën e dytë, për kontroll më të detajuar të bagazheve, shtetasin kosovar Sh. Th, 37 vjeç, i cili udhëtonte për në Dubai.
Si rezultat i kontrollit, shërbimet e Policisë Kufitare kanë gjetur të fshehura në çantën e shtetasit kosovar, 15000 euro, të cilat ky shtetas nuk i kishte deklaruar.”– thuhet në njoftimin e Policisë.
Në përfundim të veprimeve, shtetasi Sh. Th. u procedua penalisht për veprën ”Mosdeklarim në kufi i të hollave dhe i sendeve me vlerë”, si dhe kanë sekuestruar në cilësinë e provës materiale shumën e eurove.
Materialet i kaluan Prokurorisë së Rrethit Gjyqësor Tiranë, për veprime të mëtejshme.
