Policia ka arrestuar tregtarin e gazit që lidhet me ngjarjen e ndodhur në Velipojë ku si pasojë e shpërthimit të bombolave u plagosën nëna dhe tre fëmijët e saj.
Tregtari ushtronte veprimtarinë e shitjes së gazit pa licencë në këtë aktivitet.
Ai akuzohet për 4 vepra që bien ndesh me ligjet në fuqi.
Në Velipojë në datën datë 04.07.2021, në fshatin Pulaj Plazh, në një hotel trekatësh, shpërtheu një bombole gazi dhe la të dëmtuar shtetasit A. Gj. 40 vjeçe, D. Gj. 19 vjeçe, K. Gj. 15 vjeçe dhe E. Gj. 12 vjeç.
Njoftimi i plotë:
Ushtronte pa licencë aktivitetin tregtar të shitjes së gazit, vihet në pranga nga Policia.
Nga strukturat e Seksionit për Hetimin e Krimit Ekonomiko-Financiar u bë arrestimi në flagrancë i shtetasit:
P.M., 46 vjeç, banues në Shkodër, për veprat penale “Fshehja e të ardhurave”, “Ushtrimi pa licencë i aktivitetit tregtar”, “Shkelja e rregullave mbi lëndët djegëse” dhe “Tregtimi dhe hedhja për konsum e lëndëve djegëse, në kundërshtim me ligjin”.
Në vijim të veprimeve hetimore për ngjarjen e ndodhur më datë 04.07.2021, në fshatin Pulaj Plazh, Velipojë, Shkodër, në një hotel trekatësh, ku si pasojë e shpërthimit të një bombole gazi mbetën të dëmtuar shtetasit A. Gj. 40 vjeçe, D. Gj. 19 vjeçe, K. Gj. 15 vjeçe dhe E. Gj. 12 vjeç, u konstatua se gazi që përdorej në këtë hotel tregtohej në kundërshtim me ligjin nga shtetasi P. M., të cilit një ditë pas ngjarjes iu bllokua aktiviteti nga ISHTI.
Shtetasi P. M. e ka shkelur masën e bllokimit të aktivitetit duke vazhduar tregtimin pa licencë të gazit të lëngshëm dhe të naftës, jashtë kushteve tekniko-ligjore.
Materialet iu referuan Prokurorisë së Rrethit Gjyqësor Shkodër, për veprime të mëtejshme.
