Papa Françesku është parë duke dalë nga spitali të Mërkurën, 10 ditë pasi iu nënshtrua një operacioni për të hequr gjysmën e zorrës së trashë.
Sikurse raporton “VatikanNews”, pasi doli nga spitali Gemelli të mërkurën në mëngjes ai vizitoi Bazilikën e Shën Mërisë së Madhe për t’u lutur përpara ikonës së Virgjëreshës Mari, përpara se të kthehej në Vatikan.
Drejtori i Zyrës së Shtypit të Selisë së Shenjtë, Matteo Bruni, ka konfirmuar se Ati i Shenjtë u lirua nga Spitali Agostino Gemelli pak pas orës 10.30 të mëngjesit.
Duke iu përgjigjur pyetjeve të gazetarëve, ai u shpreh: “Para se të kthehej në Vatikan, Papa shkoi në Bazilikën e Shën Mërisë së Madhe ku, përpara ikonës së Virgjëreshës, ai shprehu mirënjohjen e tij për suksesin e operacionit të tij dhe bëri një lutje edhe për të gjithë të sëmurët, veçanërisht ata që kishte takuar gjatë qëndrimit të tij në spital. Pak para mesditës ai u kthye në Casa Santa Marta “.
Papa Françesku ka hequr gjysmën e zorrës së trashë më 4 korrik, operacioni i tij i parë i madh që kur u bë papë në vitin 2013. Ishte një procedurë e planifikuar për në fillim të korrikut, kur audiencat e papës pezullohen gjithsesi dhe kur zakonisht do të merrte pak kohë pushim.
