Dy qendra vaksinimi janë vandalizuar në Francë mes protestave kundër futjes së rregullave më të ashpra të koronavirusit nga qeveria.
Siç shkruan BBC, një vend në Francën jug-lindore u shkatërrua dhe u përmbyt me ujë me një zorrë zjarrfikësish të Premten në mbrëmje.
Një ditë më vonë, një klinikë tjetër në jug-perëndim u shkatërrua pjesërisht pasi iu vu flaka.
Incidentet erdhën në një fundjavë të demonstratave kundër masave të ashpra anti-Covid.
Të Shtunën, më shumë se 100 mijë njerëz dolën në rrugë nëpër Francë për të kundërshtuar rregullat e vendosura për të trajtuar infeksionet në rritje.
Këto masa përfshijnë vaksinimin e detyrueshëm për punonjësit shëndetësorë dhe lejet e shëndetit për të hyrë në shumicën e vendeve publike.
Kritikët kanë akuzuar qeverinë e Presidentit Emmanuel Macron se po shkel liritë e tyre.
Grafitet kundër vaksinave u gjetën pranë një qendre vaksinimi të vandalizuar në Lans-en-Vercors, pranë qytetit jug-lindor të Grenoble. Sulmi me zjarr i së shtunës shënjestroi një klinikë në fshatin Urrugne afër Biarritz në jug-perëndim.
Ndërkohë në një tubim në Paris të Shtunën, politikania franceze Martine Ëonner u tha protestuesve të “rrethonin” zyrat e ligjvënësve që mbështesnin politikat e qeverisë Covid.
Një skeptike e njohur e vaksinave kundër Covid-19, zonja Ëonner u përball me një hetim ligjor dhe u detyrua të linte grupin e saj të opozitës në parlament të dielën. Ajo tha se fjalët e saj ishin keqkuptuar.
Pavarësisht akteve të dhunës dhe vandalizimit, qindra mijëra njerëz janë regjistruar për vaksinat pasi Macron zbuloi planin e masave të tij javën e kaluar.
