Një 22-vjeçar është arrestuar në Lezhë pasi akuzohet për vjedhje.
Në pranga ka rënë i riu me iniciale Xh.B., i cili sipas policisë dyshohet se ka vjedhur tre celularë, një sasi lekësh si dhe disa bizhuteri që i përkisnin shtetases me iniciale V.P.
Një 30-vjeçar është arrestuar në Fier pasi ka kanosur me armë zjarri duke qëlluar në ajër fqinjin e tij.
Në pranga ka përfunduar edhe i ati i cili është kapur me një armë pa leje.
Njoftimi Lezhë
“Policia e Lezhës ka arrestuar një 22-vjeçar me inicialet Xh. B., pasi dyshohet se i ka vjedhur 3 aparate celularë, një sasi lekësh dhe disa bizhuteri një gruaje me inicialet V.P, të cilat më pas i çoi t’i shiste në një pikë në qytet, por janë sekuestruar në cilësinë e provës materiale. Materialet hetimore u referuan në Prokurorinë e Rrethit Gjyqësor Lezhë, për veprime të mëtejshme, për veprat penale “Vjedhja” dhe “Përvetësimi i parave dhe mallrave që rrjedhin nga vepra penale ose veprimtaria kriminale.”
Njoftimi Fier
“Fier
Policia parandalon përshkallëzimin e mëtejshëm të një konflikti me pasoja të rënda për jetën.
Reagimi i menjëhershëm dhe profesional i Policisë ka bërë të mundur neutralizimin dhe prangosjen e 30-vjeçarit, i cili gjuajti në ajër dhe kanosi me armë zjarri fqinjin e tij. Gjatë ndërhyrjes, Policia ka vënë në pranga edhe babain e 30-vjeçarit, pasi edhe ai posedonte një armë zjarri pistoletë. Sekuestrohet arma e zjarrit automatik me fishekë në fole gati për qitje, arma e zjarrit pistoletë dhe municion luftarak.
Shërbimet e Komisariatit të Policisë Fier, pas një telefonate të ardhur në Sallën Operative të DVP Fier se në fshatin Mbrostar Ura, një shtetas po qëllonte me armë zjarri, menjëherë kanë shkuar në adresën e dhënë, duke parandaluar ngjarjen e mundshme kriminale.
Punonjësit e Policisë kanë bërë të mundur neutralizimin dhe prangosjen e shtetasit F.(I). Z., i cili pas një konflikti për motive të dobëta me fqinjin e tij, shtetasin M. K., 55 vjeç, e ka kanosur atë duke gjuajtur në ajër me armë zjarri automatik, nga oborri i banesës së tij.
Në vijim të veprimeve, nga specialistët për Hetimin e Krimeve në Komisariatin e Policisë Fier u arrestua në flagrancë shtetasi F. (I). Z., 30 vjeç, banues në Mbrostar Ura, Fier, si dhe babai i tij, shtetasit P. Z., 59 vjeç, banues në Mbrostar Ura, Fier, i cili mbante pa leje një armë zjarri pistoletë.
U sekuestruan në cilësinë e provës materiale një armë zjarri automatik, një pistoletë dhe një krehër me 18 fishekë. Materialet do i kalojnë Prokurorisë pranë Gjykatës së Shkallës së Parë Fier, për veprat penale “Mbajtja pa leje e armëve dhe municionit luftarak” dhe “Kanosja”.”
