Një version kokërr i vaksinës Covid-19 mund të jetë një mundësi e mirë për të rritur ritmin e vaksinimit në vendet ku procesi po ecën ngadalë, tha zhvilluesi i saj.
Kompania ‘Oramed’ me qendër në Jeruzalem ka marrë miratim nga Qendra Mjekësore e Tel Avivit, Sourasky, për të filluar një provë klinike mbi 24 vullnetarë të pavaksinuar për një version kokërr me dozë të vetme të një vaksine që po zhvillohet nga firma indiane ‘Premas Biotech’.
Oramed njoftoi në mars se kishte testuar kokrrën e saj mbi derrat dhe ata kishin prodhuar antitrupa pas marrjes së kapsulës.
Kompania, e cila është e specializuar në krijimin e versioneve orale të ilaçeve që zakonisht merren përmes një injeksioni, po kryen aktualisht prova për kokrrën e saj të insulinës orale për të trajtuar diabetin tip 2. Vaksinat ekzistuese Covid-19 administrohen përmes një ose dy injeksioneve.
CEO i Oramed, Nadav Kidron, i tha Times of Israel se prova për kokrrën e vaksinës Covid-19 pritet të fillojë muajin tjetër, pasi të marrë miratimin përfundimtar nga Ministria e Shëndetësisë.
Ai tha se kokrra mund të përdoret si një përforcues kundër variantit më ngjitës Delta.
